Read kumam Salmos 22 Bible Online

Salmos 22 - kumam bible

Salmos 22

¹B'itz tu'n David Nman Dios, Nman Dios, ¿tiqu'n ma chin kyaj tkolina? ¿Tiqu'n mi'n saja kolol wi'je? ¿Tiqu'n minti' in tzaj tq'o'na twi'ya wi'je ok in chin ayayane?

²Aya Nman Dios, in chin kub'sane twitza q'ijl ex qonik'an, ex minti' in tzaj ttzaq'we'na, minti' ch'in ojlab'l weye.

³Ex aya xjan; q'uqliya tuj tq'uqb'ila tu'n tkawina ex tu'n tjaw nimsa'na kyu'n aj Israel.

⁴Qe qxe'chele o qe' kyk'u'j ti'ja ex o che kolpet tu'na;

⁵xi kyqanin onb'il teya ex e tzoqpet tu'na. O qe' kyk'u'j ti'ja ex tu'n jlu minti' kub' kych'ixwi.

⁶Ja'lo mer ik tza'n mya xjal qine, ma chin oke ik tza'n jun tal ẍuq', ma chin el ik'une kyu'n xjal.

⁷Qeju in che ke'yin weye in che xmayin wi'je, in xi kyyukun kywi' te jun techal kyxmayb'il,

⁸ex in kyma'n: O qe' tk'u'j ti'j Qman, ¿tiqu'ntzun minti' ma tzul kolol ti'j qa ax tok at tgan ti'j? Che chi.

⁹Ex tu'na in ul itz'je ti'j ntxu'ye, ex aya q'uqb'ante nk'u'je tej ntene ttzi t-xu'k ntxu'ye.

¹⁰Tej na'nxtoq wul itz'je kwentin qine tu'na, ex axa Ndiosa tej atinxtoqe tuj talb'il ntxu'ye.

¹¹Mi'n tz'el tpa'n tib'a wi'je, ex ch'ix ttzaj jun b'is wib'aje ex mi a'l jun onil weye.

¹²Ma b'aj kytxolb'an kyib' qe aj q'oj wi'je, mer ik tza'n qe tor puro jawni ate' tuj tx'otx' Basán.

¹³In che tzanun wi'je ik tza'n qe b'alun puro tx'u'j, ex in xi kyk'ab'in tuj kytzi' tu'n kytzaj lipan wi'je.

¹⁴Ma chin oke ik tza'n a' nne'l qojl, ex ma che q'ulpaj qe nb'aqile. Aju wanmiye in kub' ulj max wuje mer ik tza'n xkab'.

¹⁵Puro tzqij tuj ntzi'ye, mer ik tza'n xk'o'n, ex b'i'x ma tz'ok tlak'on tib' waq'e twitz nk'o'ne. Ma chin ku'x tq'o'na tuj kymuqb'il kyimni.

¹⁶At jun k'loj xjal mya b'a'n ma b'aj kytxolb'an kyib' wi'je, ik tza'n tx'yan tu'n kyok tzoqpaj wi'je. Ma b'aj kyxyu'n ti'j nq'ab'e ex ti'j nqane.

¹⁷Q'ancha'lxix qe nb'aqile. Minti' nne'l kyi'n kywitz aj q'oj wi'je.

¹⁸Ma jaw kyi'n swert ti'j nxb'alune ex ma b'aj kysipan kyxolx.

¹⁹Ex aya Nman q'ol wipumale, mi'n tz'el laq'e'ya wi'je, tzaj naja onil weye.

²⁰Chin tkloma tu'n mi'n nkyime tu'n spad, ex mi'n txi tq'o'na amb'il tu'n nkub'e kyu'n qe xjal mer tx'yan qe.

²¹Chin tkloma kye qe xjal mer b'alun qe, ex chin tkloma kye xjal mer at kykach ik tza'n qe tor.

²²Kxel nma'ne tqanil ti'ja kye wermaniye, ex kxel nq'o'ne chjonte teya kyxol qeju in kub' kyb'uyin kyib'.

²³Aqeye b'a'n che niman te Qman, kyq'onxe chjonte te; kykyaqil qeye tiyjil Jacob kynimsa'n jawe tb'i, che k'ulune kykyaqile twitz, aqeye tiyjil Israel.

²⁴Minti' in che el tik'un qe xjal meb'a, ex minti' nnik' tna'l tu'n aju yajb'il kye, minti' nne'l tewan twitz kyi'j, ex in che tzaj tb'i'n ok in kyqanin onb'il.

²⁵Ok tkub' kyb'uyin kyib' nim xjal etzan tu'na, kxel nq'o'ne chjonte teya kywitz, ti'j ju ma tb'inchaya, ex kywitz qeju in che niman teya kjapunel wu'ne aju o txi ntziyane teya.

²⁶Qe xjal meb'a ok che wa'l okxi tnoj kyk'u'j, kxel kyq'o'n chjonte te Qman qeju in che jyon onb'il tuk'il, kukxwit che tzalaje.

²⁷Aqeye xjal te tkyaqil k'loj kyiyjile, ex te tkyaqil tnam, ex kykyaqil xjal ttxa'npun tx'otx', tzulx Qman ti'j kyk'u'je ex kytzaje tuk'il; che ẍmejekuye twitz.

²⁸Porke ate Qman aju rey ex a in kawin kyib'aj qe nasyon.

²⁹Mok'ek kywi'ye ex che k'ulune o'kx te, kykyaqile aqeye at nim kyeye, ex kykyaqil qeju che kymel, ex mlay che anq'in kyu'nx kyib'.

³⁰Qe wiyjile che ul itz'j te tib'ajxi che k'ulul te Qman ex mlay che q'ajen tu'n kyyolin ti'j;

³¹kxel kyma'n kye qeju che ul itz'j te tib'ajxi ti'j taq'unb'en Qman, qa ate Qman tz'aqlxix.