Read kumam Salmos 25 Bible Online

Salmos 25 - kumam bible

Salmos 25

¹B'itz tu'n David Nman, in chin kub'sane twitza;

²aya Ndiose, ti'ja q'uql nk'u'je: mi'n taq'a amb'il tu'n tkub' nch'ixwiye. Mi'nwt chin oke te kytzeb'l qe aj q'oj wi'je.

³Mi'nxwit kub' kych'ixwi qeju q'uql kyk'u'j ti'ja. Kub'xwit kych'ixwi qeju noq elajx in jaw kyi'n kyib' ti'ja.

⁴Nman, yek'untza qe tb'eya weye; ex chin t-ẍaqlunxa kyuj qe;

⁵chin t-ẍaqlunxa tu'n tyola axix tok, ex chin t-xnaq'tzama, porke aya Ndiose ex klol weye. O'kx ti'ja q'uql nk'u'je tkyaqil q'ij.

⁶Nman, na'ntza aju tk'ujlalila ex ju t-xtalb'ila, aqeju e tzaj tyek'una qeye atxix ojtxi,

⁷mi'n tzaj tna'na qe wile ex mi qe mya b'a'n o nb'inchaye tuj nku'xumale. Nman, chin tna'ntza tu'nju tk'ujlalila ex t-xtalb'ila ma'xix.

⁸B'a'nte Qman ex tz'aqlxix; kyja'tzun in xi tyek'un b'e b'a'n kye xjal aj il,

⁹in che'x t-ẍaqlu'n qe mans tuj tb'e; ex in che'x t-xnaq'tza'n ti'j ju tz'aqlxix.

¹⁰Ate Dios axix tok tyol ex kukx at tk'ujlalil kyi'j qeju in japun kyu'n aju yol kyaj b'ant ti'j tu'n kyuk'il, ex qe tmandamyent.

¹¹Tu'nju ma'xix toklen tb'iya Nman, najsama aju wile ma'xix.

¹²Aju xjal in niman te Qman, kxel yek'un te alkye b'e tu'n t-xi ti'n:

¹³ok k'anq'il tuj tzalajb'il tu'n, ex kxel tq'o'n kyoklen qe tiyjil tu'n kyetzante aju tx'otx'.

¹⁴Nno'k Qman te kyamiw qe xjal in che niman te, ex in xi tma'n kye aju yol kyaj b'ant ti'j tu'n.

¹⁵Kukx in xi nke'yine ti'j Qman, porke ate in klonte weye tuj tkyaqil xob'ajil.

¹⁶Chin tke'yintza Nman, ex q'aq'antz tk'u'ja wi'je, ex njunale atine ex in chin b'isune.

¹⁷Nim in b'isun wanmiye; chin tkloma tuj yajb'il weye.

¹⁸Ke'yintza aju nb'ise ex ju yajb'il weye ex najsama qe wile.

¹⁹Ke'yintza, ma che chmet nim aj q'oj wi'je; nimxix ma chin el kyik'un.

²⁰Chin tkwentin oka ex chin tkloma. Mi'n taq'a amb'il tu'n tkub' nch'ixwiye, porke ti'ja ma tz'ok nklon wib'e.

²¹Tz'ajb'enxwit te kolb'il weye aju nmodiye b'a'n ex tu'nju minti' wile, porke ti'ja ma tz'ok qe' nk'u'je.

²²Nman Dios, kloma qe aj Israel tuj tkyaqil yajb'il kye.