Read kumam Salmos 27 Bible Online

Salmos 27 - kumam bible

Salmos 27

¹B'itz tu'n David Ate Qman spik'un weye ex klol weye. ¿Al etzun chin xob'ile? Ate Qman klol weye tuj tkyaqil xob'ajil, kyja'tzun mlay chin xob'e.

²Qe xjal b'inchal mya b'a'n, aqeju aj q'oj wi'je, b'aj kychmon kyib' tu'n kyok tzoqpaj wi'je ex tu'n nnaje kyu'n, pero ax qe e jaw tolj ex e kub' tz'aq.

³Maske b'aj kytxolb'an kyib' txqan soldad wi'je, mlay tzaj b'aj nk'u'je; maske che ok ten q'ojlel wi'je, pero kukx kqeb'il nk'u'je.

⁴O'kx jun in xi nqanine te Qman, junx waje te; atzun tu'n ntene tuj tja Qman tuj tkyaqil q'ij te wanq'ib'le, tu'ntzun nk'ulune te ex tu'n ntzalaje ti'j tu'nju tb'anilxix te.

⁵Ok ttzaj mya b'a'n wi'je, chin xel ewane tu'n Qman tuj t-xlekumal, chin okex ewane tu'n tuj tja tu'n nklete; chin jawix q'o'ne tu'n twi' jun pik tu'n nklete.

⁶Kyja'tzun kb'el kyi'j aj q'oj wu'ne, aqeju kytxolb'an kyib' wi'je, ex kyja'tzun kxel nq'o'ne chojb'il te Qman tuj tja; ok chin sch'ile tu'n tzalajb'il; chin b'itzale te Qman.

⁷In chin q'ajte ti'ja Nman, chin tb'intza. Q'aq'antz tk'u'ja wi'je, chin ttzaq'wentza.

⁸Aju wanmiye in tma'n weye kyja': Tz'ok tililx tu'na tu'n ttena tuk'il Qman. Kyja'tzun nno'k tilil wu'ne tu'n ntene tuk'ila Qman.

⁹Mi'n tz'el tewan tib'a nwitze Nman, mi'n tzaj tq'oja wi'je ex mi'n chin el tik'una; o'kxku aya onil weye. Mi'n chin kyaj tq'o'na njunalxe ex mi'n chin kyaj tkolina, porke o'kx aya Ndiose ex klol weye.

¹⁰Maske ma chin kyaj koline tu'n nmane ex tu'n ntxu'ye, pero aya k'okel kwentin weye Nman.

¹¹Nman, yek'untza aju tb'eya weye, chin t-ẍaqlunxa tuj b'e jiqun ti'j, tu'n kylaj qe aj q'oj wi'je.

¹²Mi'n chinx ttzoqpi'na tuj kyq'ab' aj q'oj, porke ma che ok ten xjal nik'al yol wi'je, ex o'kx in che ximan ti'j tu'n nk'ixb'isanjtze kyu'n.

¹³Ex ma qe' nk'u'je ti'j tu'n nk'monteye t-xtalb'il Qman akux itz'x qine tzalu twitz tx'otx'.

¹⁴Qe'k tk'u'ja ti'j Qman, tenx tipuna ex mi'n b'aj tk'u'ja. Ax tok qe'k tk'u'ja ti'j.