Read kumam Salmos 28 Bible Online

Salmos 28 - kumam bible

Salmos 28

¹B'itz tu'n David Nman, aya kolol weye, in chin kub'sane twitza mi'n noq chin tzaj tb'i'na, chin ttzaq'wentza. Ex qa mi'n ma chin tzaj ttzaq'we'na, ajun qine chin okel tajlal kyuk'il qeju in che kyim.

²B'intza tq'ajq'ajel nwi'ye ok t-xi nqanine onb'il teya, ok kyjaw nq'o'ne nq'ab'e twitz kya'j tumlal tjaya xjan.

³Mi'n kub' tq'o'na ncastiwoye junx kyuk'il qe xjal mya b'a'n ex qe xjal b'inchal mya b'a'n, ex noq tu'n kytzi' in kyma'n qa at kyk'ujlalil, atzun tuj kyanmi nojni tu'n mya b'a'n.

⁴Q'onkuya kycastiw ik tza'nx ju kyb'inchb'en mya b'a'n, ex q'onxa chojb'il kye ax ik tza'nx ju mya b'a'n o kyb'incha.

⁵Tu'nju minti' in xi kyniman tkyaqilju o tb'incha Qman, kyja'tzun che najel tu'n, ex mlay che jaw we'tl juntl maj.

⁶Nimanxwit te Qman tu'nju ma che tzaj tb'i'n qe nkub'sb'ile.

⁷Ate Qman kolol weye ma'xix tipumal, o'kx ti'j q'uql nk'u'je, ate oninte weye. In tzalaj wanmiye; chin b'itzale ex kxel nq'o'ne chjonte te Qman.

⁸Ate Qman q'olte tipumal tnam etzan tu'n, ex ate onil ex kolol ti'j rey jaw t-sk'o'n.

⁹Kloma aju tnam etzan tu'na Nman, ex ky'iwlama qeju o che jaw t-sk'o'na. Tz'okxa ik tza'n jun pastor, kwentin oka qe ex q'inxa qe tuj tq'ab'a te jumajx.