Read kumam Salmos 30 Bible Online

Salmos 30 - kumam bible

Salmos 30

¹B'itz tu'n David Nman, kjawil nnimsa'ne tu'nju ma chin klete tu'na, ex tu'nju minti' taq'a amb'il tu'n kyxmayin qe aj q'oj wi'je.

²Nman Dios, xi nqanine onb'il teya ex o chin b'anixe tu'na;

³Nman, ma chin klete tu'na tuj kamik; ma tzul nnab'le tu'na, ma chin klete tu'na tu'n mi'n nkyime.

⁴Aqeye in che niman te Qman, che b'itzane b'itz te, kynimsan jawe tb'i xjan.

⁵Porke noq ch'in tuj in ten tq'oj, atzunju t-xtalb'il kukx in ten tuj tkyaqil qanq'ib'l. Qa ma qo oq' te qonik'an, atzun ok qsqix qo tzalajel.

⁶Tuj nwitze qa segur atine, ex kub' nximane kyja': Minti' jun jaku chin kub' tz'aqe tu'n.

⁷Nman, tu'nju t-xtalb'ila ma chin kub' twab'ana tuj jun lugar segurxix, ex te tib'ajxi ma tz'el tewan twitza wi'je. Ma naj nnab'le tu'n xob'ajil.

⁸Ti'ja in jaw tq'ajq'ajel nwi'ye Nman, ex teya in chin kub'sane.

⁹¿Ti ktkamb'a'ya ti'j qa ma chin kyime ex qa ma chinx q'i'ne tuj muqb'il? Ok tok nximlale te tx'otx' mlay jaw nnimsa'na, ex mlay chin yoline ti'j ju ttena tz'aqlxix.

¹⁰Nman, chin tb'intza ex q'aq'antz tk'u'ja wi'je; chin tonintza Nman.

¹¹Ma tz'el ti'na b'is wi'je ex ma tzaj tq'o'na tzalajb'il te t-xel; aju nxb'alune tok te techal b'is, ma tz'el ti'na, ex ma tz'ok tq'o'na jun nxb'alune te tzalajb'il.

¹²Kyja'tzun Nman Dios, mlay chin kub' tene tu'n mi nq'ajte; che xel nb'itzane qe b'itz te nimb'il teya ex kukx kxel nq'o'ne chjonte teya.