Read kumam Salmos 31 Bible Online

Salmos 31 - kumam bible

Salmos 31

¹B'itz tu'n David Nman, ti'ja ma tz'ok nklon wib'e, mi'n taq'a amb'il tu'n tkub' nch'ixwiye. Chin tkloma porke aya jun Dios tz'aqlxix.

²Chin tb'intza, juratx chin tklom naja. Tz'okxwita te weye ik tza'n jun pik tu'ntzun nklete tu'na, tz'okxwita te jun matij ja kyuw tten te kolb'il wib'e ex kolol weye.

³Ik ttena te weye ik tza'n jun pik ex ik tza'n jun matij ja kyuwxix tten. Chin t-ẍaqluma ex chin tkwentin oka tu'ntzun tjaw nimsa'n tb'iya.

⁴Chin ti'n etza tuj k'ob'il ma kub' kyq'o'n aj q'oj wi'je, porke aya kolol wi'je.

⁵Tuj tq'ab'a in xi woqxenane wanmiye; tzaja kolol wi'je Nman, aya Dios axix tok.

⁶In che el wik'une qe xjal in che k'ulun kywitz qe tilb'ilal minti' kyajb'en. O'kx ma tz'ok qe' nk'u'je ti'ja Nman.

⁷Chin tzalajele nim tu'nju at tk'ujlalila wi'je. Ma tila qe nb'ise, ojtzqi'n tu'na aju k'ixk'oj in tzaj wi'je;

⁸minti' ma chinx tq'o'na tuj kyq'ab' qe aj q'oj wi'je; kub' tq'o'na qine tuj jun lugar segurxix.

⁹Nman, q'aq'antz tk'u'ja wi'je porke atine tuj xob'ajil. Qe tb'aq' nwitze tuk'ix nximlale ex tuk'ix wanmiye minti'tl kyipun tu'n b'is.

¹⁰Niban tb'aj nchwinqlale tu'n k'ixk'oj. Jurat nib'an kyel wab'q'iyile; in b'aj wipune tu'n b'is, nib'an tb'aj tipun nximlale.

¹¹Ma chin oke te kyxmayb'il qe aj q'oj wi'je, ax ikx kyu'n qe nvesine; noq in che el sek'paj qe wamiwoye wi'je. Aqeju in che ok ke'yinte weye tuj cay, b'i'x in che el oq wi'je.

¹²B'i'x ma tzik' nna'njtze kyu'n mer ik tza'n ma chin kyime. Ik ma chin oke ik tza'n jun xar ma b'aj pax.

¹³In nb'i'ne qe xjal in che si'min yol wi'je. At xob'ajil tuj tkyaqil part. Kykyaqil in b'aj kyximan mya b'a'n wi'je ex in b'aj kyximan tu'n nkyime kyu'n.

¹⁴Atzun weye Nman, q'uql nk'u'je ti'ja, in xi nma'ne: Aya Ndiose.

¹⁵Kwentin qine tu'na tuj tkyaqilju in b'aj wi'je; chin tkloma kywitz qe aj q'oj wi'je, aqeju lepcho'k wi'je tu'n nkub'e kyu'n.

¹⁶Chin tke'yintza tuk'il t-xtalb'ila, aqine tmajena, ex chin tkloma tu'nju tk'ujlalila.

¹⁷Ti'ja in jaw tq'ajq'ajel nwi'ye Nman, mi'n kub' tq'o'na nch'ixwiye. Q'onkuya kych'ixwi qe xjal b'inchal mya b'a'n ex q'onku'xa qe tuj kynajb'il kyimni tu'n mi kyq'ajt.

¹⁸B'inchama tu'n mi kyq'ajtl qe xjal nik'al yol in che ik'un ex jawni qe, ex in che yolin mya b'a'n ti'j ju xjal tz'aqlxix.

¹⁹Ma'xix t-xtalb'ila kyuk'il qeju in che niman teya. In xi tk'u'na ik tza'n jun q'inumab'l, ex kywitz qe xjal in xi t-sipana kye qeju q'uql kyk'u'j ti'ja.

²⁰Tu'nju ate' tuk'ila, che kletel tuj mya b'a'n in b'aj kyximan xjal; in che okx tklo'na qe tuj tjaya kywitz qe yol mya b'a'n kyu'n qe aj q'oj kyi'j.

²¹Nimanxwit Qman tu'nju tk'ujlalil, tb'incha nimku b'a'n weye tej nklete tu'n tuj jun tnam tok muro ti'j.

²²Tzaj nxob'ile ex xi nma'ne jun yol kyja': Ma chin kyaj koline tu'n Qman, nchiye, pero tej t-xi nqanine onb'il teya, tzaj tb'i'na tq'ajq'ajel nwi'ye.

²³Kyk'ujlame Qman kykyaqile aqeye in che niman te. In che ok tkwentin Qman qeju in che b'et tuj tumelxix, ex qeju in jaw kyniman kyib', in kub' tq'o'n kycastiw tuj tumelxix.

²⁴Tenx kyipune ex kyuwx kyk'u'je kykyaqile q'uql kyk'u'je ti'j Qman.