Read kumam Salmos 32 Bible Online

Salmos 32 - kumam bible

Salmos 32

¹Xnaq'tzb'il tu'n David At tzalajb'il kye xjal in kub' najsa'n kyil ex in kub' maqsi'n kyil.

²At tzalajb'il te xjal aju mlay tzaj na'ntl til tu'n Qman ex minti'tl sb'ub'l tuj tanmi.

³Tej na'nxtoq tjatz npa'ne wile, o nna'ye qa kyja'toq tnaj nximlale tu'nju in chin ayayane nne'x q'ij.

⁴Tu'nju q'ijl ex qonik'an in k'ixb'isanjtze tu'na. Kyja'tzun b'i'x b'aj wipune ex ik in oke ik tza'n qe b'ech in che kub' motx'j tu'n tkyaqal q'ij tuj koresma.

⁵Ex jatz npa'ne wile twitza ex aju nb'inchb'ene mya b'a'n; minti' kub' wewane ex o nmaye kyja': Kjawitz npa'ne wile twitz Qman; kyja'tzun kub' tnajsa'na wile.

⁶Tu'ntzun jlu, qeju nimal teya ok che kub'sal twitza tuj tq'ijlalil yajb'il kye, ex maske xob'ajilxix tke'yink aju nima ok tjaw ch'iy, pero mlay kanun kyi'j.

⁷Aya kolb'il weye; in chin klete tu'na tuj xob'ajil, chin b'itzale tu'nju at kolb'il weye tu'na ex txolin wi'je tu'na.

⁸Chi Qman in tma'n kyja': K'okel nkwentina, kxel nq'o'ne xnaq'tzb'il teya, kxel nq'o'ne consej b'a'n teya, kxel nyek'une teya alkye b'e tu'n t-xi ti'na.

⁹Mi'n tz'oka ik tza'n qe chej ex qa ik tza'n qe mul minti' kynab'l ex il ti'j tu'n tok jun pren ti'j kytzi' tuk'ix taq'al tu'n kynimanjtz xjal kyu'n, ex qa mi xb'ant jlu, mlay che ok laq'e' ti'ja.

¹⁰Nim k'ixk'oj tzul kyi'j qe xjal mya b'a'n, atzun qeju nno'k qe' kyk'u'j ti'j Qman, txolin kyi'j tu'n tk'ujlalil.

¹¹Aqeye tz'aqlxix ex b'a'n ta' kyanmiye, che tzalajxe ti'j Qman; che tenxe alegr ex tjaw tq'ajq'ajel kywi'ye kyuw tu'n tzalajb'il.