Read kumam Salmos 33 Bible Online

Salmos 33 - kumam bible

Salmos 33

¹Aqeye xjal tz'aqlxix che tzalajxe ti'j Qman; qe xjal in che b'et tuj tumelxix b'a'n tu'n t-xi kyq'o'n chjonte te Dios.

²Kyq'onxe chjonte te Qman tu'n tq'ajq'ajel twi chnab' arpa, che b'itzane tuk'il tq'ajq'ajel kitar.

³Kyb'itzanxe jun b'itz ak'aj te Qman, kyq'ajtza'nke qe chnab' mejorxix wen ex che sch'ine tu'n tzalajb'il.

⁴Aju tyol Qman axix tok te, ex tu'nju tb'inchb'en nne'l qnik' ti'j qa in japunxix tyol.

⁵In tzalaj Qman qi'j qa in qb'incha'n aju tz'aqlxix ex qa in qo b'et tuj tumelxix; tkyaqil twitz tx'otx' nojni tu'n tk'ujlalil.

⁶Tu'n tyol Qman ex tu'n T-xew b'ant kya'j tuk'ix tkyaqilju at twitz.

⁷Tu'n Qman tchmon tib' a' tuj mar, ex junx in kub' tk'u'n aju nintz mar tuj jun tkub'il.

⁸Aqeye xjal tuj tkyaqil twitz tx'otx', che xob'e twitz Qman ex che nimane te.

⁹Ex tej tyolin Qman b'i'x b'ant tkyaqil, ex tej t-xi tma'n tyol ax kyaj ten tkyaqil.

¹⁰In b'aj ttzakun Qman aju in kub' kyximan qe txqantl nasyon tu'n tb'inchet kyu'n,

¹¹atzunju ximamaj tu'n Qman in kyaj ten te jumajx.

¹²At tzalajb'il teju nasyon a Qman ma tz'ok te Kydios, aju ma jaw t-sk'o'n Dios tu'n tok te tekuxix.

¹³Max tuj kya'j in che tzaj tke'yin Qman kykyaqil xjal;

¹⁴max tuj tnajb'il in che tzaj tke'yin qe xjal najl twitz tx'otx';

¹⁵a Qman o b'inchante kyanmi ex tok tkwent ti'j tkyaqilju in kyb'incha'n.

¹⁶Mi jun rey jaku klet noq tu'nju at nim t-soldad, ex maske at nim kyipun xjal, pero mya tu'nju at kyipun jaku che klet.

¹⁷Tuj q'oj noqx gan nno'k qe' kyk'u'j xjal kyi'j chej; maske at nim kyipun pero mlay che klet xjal kyu'n.

¹⁸Atzun qeju in che niman te Qman ex in qe' kyk'u'j ti'j tk'ujlalil, kukx kwentin qe tu'n.

¹⁹In che klet tu'n te kamik, ex minti' in che kyim tuj tq'ijlalil we'yaj.

²⁰Aqo' q'uql qk'u'j ti'j Qman, a onil qe ex ti'j nno'k qklon qib'.

²¹In tzalaj qanmi ti'j Qman ex q'uqlxix qk'u'j ti'j tu'nju xjan tb'i.

²²Awt tk'ujlalila ten quk'ile Qman, ex atzun q'uql qk'u'je ti'ja.