Read kumam Salmos 34 Bible Online

Salmos 34 - kumam bible

Salmos 34

¹B'itz tu'n David tej tok tq'on tib' te lok twitz Abimelec. Atzunte Abimelec ex tlajo'n Kxel nq'o'ne chjonte te Qman tkyaqil q'ij ex kukx kjawil nnimsa'ne tb'i.

²Nim in chin tzalaje ti'j Qman; kyb'intze ex che tzalaje aqeye xjal mans.

³Kynimsa'n jawe Qman junx wuk'ile ex qnimsa'n jaw tb'i.

⁴In kub'sane twitz Qman ex in tzaj tzaq'we'ne tu'n; in klete tu'n te tkyaqilju in chin xob'toqe te.

⁵Qeju tok kywitz ti'j Qman in tzalajxix kywitz ex mlay kub' kych'ixwi.

⁶In jaw sch'ine tej atine tuj b'is, ex in tzaj b'i'ne tu'n Qman, in klete tu'n tuj tkyaqilju yajb'il weye.

⁷Aju t-anjel Qman in xq'uqin kye qeju in che niman te Qman, ex in che klet tu'n.

⁸Che nik'b'enchaqe ti'j, tz'elx kynik'e ti'j, ate Qman puro b'a'n. At tzalajb'il teju xjal nno'k qe' tk'u'j ti'j Qman.

⁹Che nimane te Qman aqeye pa'maj qeye tu'n kyajb'ene te, porke tzul tq'o'n tkyaqilju at tajb'en kye qeju in che niman te.

¹⁰Qe tal b'alun minti' kychi' ex nnik'x we'yaj kyu'n, atzun qeju in che kub'san twitz Qman, ktzajel q'o'n tkyaqilju b'a'n kye.

¹¹Kytzaje nk'wa'l ex chin kyb'intze: Che xel nxnaq'tza'ne tu'n kynimane te Qman.

¹²¿Kyajpeye tu'n kyanq'ine nim q'ij? ¿Kyajpeye tu'n kytzalaje ti'j kychwinqlale?

¹³Kyjak'um kytzi'ye tu'n mi'n kyyoline yol mya b'a'n, ex mi'n che nik'ane yol.

¹⁴Kypa'mil kyib'e ti'j mya b'a'n ex kyb'inchame b'a'n; tz'ok tililx kyu'ne tu'n kukx tu'n kytene b'a'n kyuk'il xjal.

¹⁵Kwentin qe xjal tz'aqlxix tu'n Qman ex in tzaj tb'i'n kyna'j Dios.

¹⁶Atzun qe b'inchal mya b'a'n at tq'oj Qman kyi'j, b'anin ti'j tu'n kynaj twitz tx'otx' ex tu'n mi'n ttzaj na'ntl kyb'i.

¹⁷In che kub'san qe xjal tz'aqlxix twitz Qman, ex in che tzaj tb'i'n, in che klet tu'n tuj tkyaqil yajb'il kye.

¹⁸Niqayin ta' Qman tu'n kyklet qe xjal ma tz'ok ta'w b'is ti'j kyk'u'j ex minti'tl jatum tu'n tok qe' kyk'u'j.

¹⁹Aju xjal tz'aqlxix nim yajb'il nnik'x tu'n, ex in kolpet tu'n Qman tuj tkyaqilju in tzaj ti'j.

²⁰Kwentin qe tb'aqil tu'n Qman; ex mi jun kb'el toqj.

²¹Qe b'inchal mya b'a'n, tu'nxju mya b'a'n che najel; kb'el kycastiw qeju in che ik'un kyi'j qe xjal tz'aqlxix.

²²A Qman kkolpil kye qeju in che ajb'en te, mlay kub' kycastiw qeju q'uql kyk'u'j ti'j.