Read kumam Salmos 35 Bible Online

Salmos 35 - kumam bible

Salmos 35

¹B'itz tu'n David Nman, q'ojina kyuk'il qeju in che q'ojin wi'je; tok tzoqpaja kyi'j qeju in che ok tzoqpaj wi'je.

²Tzyuma aju tmaqb'ila in ajb'en tuj q'oj ex ttzaja onil weye;

³tzyuma tlansa ex we'kuya kywitz qeju lepcho'k wi'je tu'n nkub'e kyu'n; q'mantza qa aya klol weye.

⁴E kyel oq tu'n kych'ixwi qeju kyaj tu'n nkub' b'yo'ne kyu'n, ex kyuk'ix qeju kyaj tu'n kyb'inchante jun mya b'a'n wi'je.

⁵Ikwit che ok ik tza'n ttxa triw in xi tiqan kyq'iq', ok kyex lajo'n tu'n t-anjel Qman.

⁶Tz'okwit kyb'e te qlolj ex sjilin tuj, ok kyex lajo'n tu'n t-anjel Qman.

⁷Minti' jun mya b'a'n o nb'inchaye kyi'j, ex kub' kyq'o'n jun k'ob'il wi'je ex ku'x kylaku'n jun jul tu'ntzun nxi tz'aqe tuj.

⁸Noqwit minab'en tzaj jun mya b'a'n kyi'j. Axwit qe che'x tz'aq tuj k'ob'il in kub' kyq'o'n. Ex b'a'nwt kykub' tz'aq tuj jun mya b'a'n.

⁹Ok chin tzalajele ti'j Qman porke tu'n ok chin kletele.

¹⁰Tu'n tkyaqil wanmiye kxel nma'ne: ¿Alkye juntl ik tza'n teya Nman? In che tklo'na qe meb'a ex qeju minti' kyipun kywitz qe xjal mas nim kyipun kywitz, ex kywitz qeju nne'l kyelq'a'n aju at kye.

¹¹In che jaw we' qe xjal mya b'a'n te testiw wi'je, ex in chin oke tuj xjel kyu'n ti'j ju minti' b'a'n wu'ne.

¹²Tzaj kyq'o'n mya b'a'n weye te t-xel ju b'a'n o nb'inchaye kye, ex tu'n tlaj jlu in tzaj nim nb'ise.

¹³Tej kyyab't qe tzaj nb'ise kyi'j, ok nq'o'ne nxb'alune ch'i'x twitz ex kub' nyo'ne we'yaj, ex minti' xi nkoline tu'n nna'ne Dios kyi'j tuj wanmiye.

¹⁴O chin b'isune nim kyi'j, mer ik tza'n ti'j ntxu'ye, mer ik tza'n ti'j jun wamiwoye ex mer ik tza'n ti'j jun wermaniye.

¹⁵Tejtzun ttzaj mya b'a'n wi'je kykyaqil e jaw tze'n; mer ik tza'n junxitl xjal qe ex minti' ojtzqi'n qe wu'ne, minti' xi kykolin tu'n kyyasun wi'je.

¹⁶In b'aj yajla'ne kyu'n ex e ok ten xmayil wi'je, tu'n kyq'oj jaw qitx'itx'in t-xe kye' wi'je.

¹⁷Nman, ¿kukxpetzun kxe'l tu'na, noq in tzaj tke'yina jlu wi'je? Chin tkloma kywitz qeju in che tzanun wi'je mer ik tza'n b'alun.

¹⁸Jaku txi nq'o'ne chjonte teya kywitz nimku xjal kychmon kyib'; jaku jaw nnimsa'ne kywitz tnam xjal nimxix kyajlal.

¹⁹Miwt che jaw tzalaj qe aj q'oj wi'je; mi'n taq'a amb'il tu'n kyxmayin wi'je aqeju in chin el ik'une kyu'n ex minti' jun mya b'a'n o nb'inchaye.

²⁰Aqeju xjal lu minti' in che yolin ti'j tu'n kyten xjal tuj txub'txaj, noq o'kx in che si'min yol kyi'j qe xjal b'a'n kymod, aqeju najl kyxol;

²¹in che jaw tze'n wi'je ex in kyma'n: Ma qil tu'n qwitz aju ma tzaj ti'j.

²²Nman, ma tila aju in kyb'incha'n qe xjal lu. Mi'n kyaj tena tu'n mi tq'ajta. Mi'n tz'el laq'e'ya wi'je.

²³We'ktza Nman Dios, q'i'mel twatla. B'inchantza wi'je ex kolina wi'je.

²⁴Nman Dios, b'inchantza wi'je porke aya tz'aqlxix. Mi'n taq'a amb'il tu'n kytze'n qe aj q'oj wi'je.

²⁵Mi'n taq'a amb'il tu'n kymante ex tu'n tkub' kyximan kyja': Atzun jlu qaj, b'i'x ma naj qu'n.

²⁶E ttzaj kych'ixwi ex e ttzpet kynab'l qeju in che tzalaj ti'j ju mya b'a'n ma tzaj wi'je; e ttzaj nimxix kych'ixwi ex e tnaj kynab'l qeju nno'k kyq'on kyib' mas ma' kyxilen nwitze.

²⁷E kyjaw tzalaj ex e kyjaw sch'in tu'n tzalajb'il qeju kyaj tu'n kyke'yinte weye otoq chin kamb'ane; ex kok'x tu'n kymante kyja': Ma'xix toklen Qman ex in tzalaj tu'nju b'a'n ta' tmajen.

²⁸Ok chin yolile ti'j ju in b'ant tu'na tuj tumelxix, ex tkyaqil q'ij kjawil nnimsa'ne.