Read kumam Salmos 37 Bible Online

Salmos 37 - kumam bible

Salmos 37

¹B'itz tu'n David Mi'n jaw kyaqpaja tu'n kylaj qe xjal mya b'a'n, mi'n tzaj tx'a'l tk'u'ja kyi'j qe b'inchal mya b'a'n,

²porke jurat naj che najel ik tza'n ch'im in tzqij, ex che b'el motx'j ik tza'n k'ul.

³Qe'k tk'u'ja ti'j Qman ex b'inchama ju b'a'n, tz'anq'ina twitz tx'otx' ex kukx nimanxa tyol.

⁴Tzalajxa ti'j Qman, ex tzul tq'o'n teya aju in pon tk'u'ja ti'j.

⁵Oqxenanx tib'a tuj tq'ab' Qman, qe'k tk'u'ja ti'j ex tzul onil teya.

⁶Kb'el tyek'un Dios kywitz xjal aju tb'inchb'ena b'a'n ex ju ttena tz'aqlxix, ik tza'n tqan q'ij ok nno'k chilkuq'ij.

⁷Txulekuya twitz Qman ex noq ayona ti'j ok tul onil teya. Mi'n tzaj tx'a'l tk'u'ja ti'j ju xjal jurat in jaw ti'n naj tipun, ex mi ti'j ju xjal in kub' t-ximan tu'n tb'inchante mya b'a'n.

⁸Kolinxa q'oj ex kolinxa tu'n ttzaj tlo'ch tk'u'ja; mi'n jaw q'ojla, porke tu'ntzun jlu in xi' jun yol tuj tilil.

⁹Ax tok che elex lajo'n qe xjal mya b'a'n, atzun qeju q'uql kyk'u'j ti'j Qman che okel etzal teju tx'otx'.

¹⁰Noq ch'intl taj tu'n kykub' naj qeju mya b'a'n, maske ma tz'ok tena jyolte kye pero mlay che knet tu'na.

¹¹Atzun qe xjal mans che okel etzal teju tx'otx', ex puro tuj txub'txaj che tel.

¹²Aju xjal mya b'a'n in kub' ten ximal ti'j tza'n tten tu'n tnaj ju xjal b'a'n, ex in xi tke'yin ti'j in q'ojl wen.

¹³Atzunte Qman noq in jaw tze'n ti'j ju xjal mya b'a'n, porke b'a'n tu'n qa ch'ix tpon or tu'n tnaj.

¹⁴Qe b'inchal mya b'a'n in jatz kyi'n kyspad tuj tjayil, ex nne'l kyxqinin taq'al xob'l kyplech, tu'n kykub' qe xjal meb'a kyu'n ex qe mans ex qeju in che b'et tuj tumel.

¹⁵Ex tu'nx kyspad kb'ajel xyu'n kyanmi, ex che b'ajel toqj qe xob'l kyplech.

¹⁶Aju ch'in at teju xjal b'a'n, mas nim t-xilen twitz kyq'inumab'l qe xjal mya b'a'n.

¹⁷Ex k'elel ti'n Qman kyipumal qe xjal mya b'a'n, atzun qe xjal b'a'n che b'el ttzyu'n tu'n mi kykub' tz'aq.

¹⁸Qeju minti' kypaltil, kwentin qe tu'n Qman, ex aju kyetzb'il kukx ktel te jumajx.

¹⁹Tuj tq'ijlalil mya b'a'n ok ttzaj we'yaj, mlay kub' kych'ixwi tu'nju at nim kywa.

²⁰Atzun qe xjal mya b'a'n, che b'ajel tz'e'y ik tza'n tzqij ch'im, ex qe aj q'oj ti'j Qman che b'el naj ik tza'n sib'.

²¹Aju xjal mya b'a'n in tqanin tch'ex ex minti'tl nna'j tchjo'n, atzunte xjal b'a'n in tz'e'y tk'u'j ti'j juntl ex in xi tq'o'n kotzb'aj.

²²Qeju ky'iwla'n tu'n Qman ok kyk'ma' tx'otx' te kyetzb'il, atzun qeju tkub' kysentens tu'n, che najel.

²³In xi tyek'un Qman alkye b'e tu'n t-xi ti'n xjal, ex in kub' tq'o'n tuj b'e b'a'n nne'l tuj twitz;

²⁴maske ma tzik' tz'aq, pero in jaw twab'an tib', ex tzyu'n tq'ab' tu'n Qman.

²⁵Ku'xun qine nej, atzun ja'lo ma chin tijine; ex b'ajx wile jun xinaq b'a'n otoq kyaj kolin, ex b'ajx wile in che mo'n qe tk'wa'l.

²⁶Tkyaqil q'ij in q'aq'an tk'u'j kyi'j xjal ex in xi tq'o'n pwaq te kych'ex; qe tk'wa'l in che kub' ky'iwla'n tu'n Qman.

²⁷Pa'mil tib'a ti'j ju mya b'a'n ex b'inchama ju b'a'n, ex kukxtzun ktel tnajb'ila.

²⁸In tzalaj Qman qi'j qa in qb'incha'n ju tz'aqlxix, ex minti' in che kyaj tkolin qeju wa'lxix tuj kyokslab'l, atzun qeju mya b'a'n, in che naj tu'n ex minti' in kyaj tq'o'n kyiyjil.

²⁹Qe xjal b'a'n ok che etzal ti'j ju tx'otx', ex ax che tel tuj te jumajx.

³⁰Aju xjal b'a'n at tnab'l tyol ex in yolin tuj tumel,

³¹tku'x tley Dios tuj tanmi, ex mlayx jaw jilj tqan.

³²Aju xjal mya b'a'n in xq'uqin ti'j ju xjal b'a'n, ex in ximan ti'j tu'n tkub' tb'yo'n;

³³pero mlay txi tq'o'n Qman amb'il te tu'n tkub' tz'aq xjal b'a'n tuj tq'ab', ex ok tok xjal b'a'n tuj xjel, mlay taq' Dios amb'il tu'n tkub' t-sentens.

³⁴Qe'k tk'u'ja ti'j Qman ex nimanxa, tu'ntzun jlu kjawil nimsa'na tu'n ex ktzajel tq'o'n aju tx'otx' te tetzb'ila, ex ok tila'ya ok kynaj qe xjal mya b'a'n.

³⁵O wile ju xjal mya b'a'n ex puro jawni, ik tten ik tza'n jun tze' kyja' tch'iy wen ex puro pim t-xaq;

³⁶pero tej wik'e juntl maj ya mi a'l, in jyone ti'j ex minti' knet wu'ne.

³⁷Q'o'nka kwent ti'j ju xjal tz'aqlxix ex minti' tpaltil; tuj tq'ijlalil tzul ktel xjal lu tuj txub'txaj.

³⁸Atzun qeju mib'an che niman, che najel te jumajx; tuj tq'ijlalil tzul che najel qe mya b'a'n.

³⁹In che klet qe xjal tz'aqlxix tu'n Qman, a in kolin kyi'j tuj tq'ijlalil yajb'il.

⁴⁰A Qman onil kye ex in che kolpet tu'n. In che klet tu'n tuj kyq'ab' qeju mya b'a'n, tu'nju atzun q'uql kyk'u'j ti'j tu'n kyklet.