Read kumam Salmos 4 Bible Online

Salmos 4 - kumam bible

Salmos 4

¹B'itz tu'n David Chin ttzaq'wentza Nman Dios ok nkub'sane twitza porke aya kolol weye. Tej nyajlanjtze in kolpaje tu'na, q'aq'antz tk'u'ja wi'je ex b'intza nna'j Diose.

²Aqeye xjal nno'k kyq'on kyib'e te ma' kyoklene, ¿jtojtzun kyaj kykoline tu'n wel kyik'une? ¿Jtoj b'an tkyaj kykoline tu'n kyk'ujlanteye aju minti' tajb'en ex aju nik'aj yol?

³Tz'elx kynik'e ti'j, tu'nxte Dios ma che jaw t-sk'o'n qeju in che niman te; chin tzajel tb'i'n Qman ok nkub'sane twitz.

⁴Tzajx t-xob'il kyi'je ex mi'n che b'inchane il. Che ximane ti'j jlu tuj kyanmiye ok kyxi'ye tal, ex mi'n che q'ajte;

⁵kyq'onxe chojb'il tuj tumelxix ex qe'k kyk'u'je ti'j Qman.

⁶Nimku in che q'mante: ¿Alkye ktzajel ye'kunte aju b'a'n qeye? Che chi. Nman Dios, qo tke'yintza tuk'il tzalajb'il.

⁷Ma tzaj tq'o'na mas tzalajb'il tuj wanmiye kywitz qeju in jaw kychmo'n nim triw ex ta'l twitz uva.

⁸Txub'txaj in chin kub' koẍe'ye ex in chin tane, tu'nju o'kx aya q'uqb'alte nk'u'je, Nman.