Read kumam Salmos 41 Bible Online

Salmos 41 - kumam bible

Salmos 41

¹B'itz tu'n David At tzalajb'il teju xjal in ximan kyi'j qeju minti' kyipun ex kyi'j qe meb'a; ex ok kletel tu'n Qman tuj tq'ijlalil mya b'a'n.

²K'okel kwentin tu'n Qman, kxel tq'o'n tchwinqlal ex ktzalajel twitz tx'otx', ex mlay txi q'o'n tu'n Qman tuj kyq'ab' qe aj q'oj ti'j.

³Kxel tq'o'n Qman tipun ok ttzaj yab'il ti'j ex kb'anixel tyab'il tu'n.

⁴O txi nma'ne kyja': Nman, q'aq'antz tk'u'ja wi'je; chin tq'anan oka, maske o chin b'inchane il twitza.

⁵Qe aj q'oj wi'je in kyma'n mya b'a'n wi'je, ex in che qanin ti'j: ¿Jtoj b'an tkyim ex tu'n mi'n ttzaj na'ntl tb'i? Che chi.

⁶Qa ma che ul ke'yil weye, puro b'a'n kyyol in kyma'n weye, pero mya ax tok kyu'n; in xi kyk'u'n tuj kyanmi tkyaqilju mya b'a'n in kyil wi'je, ex oktzun kyex ti'jxi in b'aj kyma'n kye kykyaqil xjal.

⁷Aqeju in che el ik'unte weye in b'aj kychmon kyib' ex in che ok ten yolil wi'je; tuj kyximb'etz qa tu'n wexwe nlaj in chin yajlanjtze,

⁸ex in kyma'n: Aju tyab'il tok puro plojxix ex minti' q'anb'il ti'j; ma kub' tz'aq tuj tkoẍb'il ex mlay jaw we'tl.

⁹Ajunlpe aju mejor wamiwoye, aju otoq tz'ok qe' nk'u'je ti'j ex o wa'n junx wuk'ile, ma tz'ok aj q'oj wi'je.

¹⁰Atzun teya Nman, q'aq'antz tk'u'ja wi'je; chin tonintza tu'n nb'anixe, tu'ntzun t-xi nq'o'ne jun chojb'il kye ti'j ju in kyb'incha'n wi'je.

¹¹Atzun k'elel nnik'e ti'j qa in tzalaja wi'je; ok mi'n kykamb'an qe aj q'oj wi'je.

¹²Atzun weye, kwentin qine tu'na tu'nju minti' npaltile, ex tu'na chin tele twitza te jumajx.

¹³Nimanxwit tb'i Qman aju Kydios aj Israel ja'lo ex te jumajx. Ikxwitju.