Read kumam Salmos 42 Bible Online

Salmos 42 - kumam bible

Salmos 42

¹B'itz kyu'n qe tiyjil Coré Ik tza'n te masat ok in txqet ti'j tk'u'j in xi' jyolte jun nima, ikxtzun weye Nman Dios, in chin jyone ti'ja.

²In txqet wanmiye ti'j Dios, aju Dios itz'. ¿Jtoj b'a'n npone tu'n tok nke'yine twitz?

³In chin oq'e q'ijl ex qonik'an ex minti' in chin wa'ne; atzun qe xjal in kyma'n weye tkyaqil q'ij: ¿Jatum ta' Tdiosa?

⁴Tkyaqil jlu in tzaj nna'ne ex in chin b'isune tuj wanmiye. In tzaj nna'ne tej nb'ete kyxol nim xjal kyja' kyxi' tu'n kypon tuj tja Dios ex nejni qine kywitz, in jaw tq'ajq'ajel kywi' tu'n tzalajb'il ex in che b'itzan in che ik'san ninq'ij kykyaqil.

⁵¿Tiqu'n in chin b'isune? ¿Ex tiqu'n in tzaj b'aj nk'u'je? O'kx ti'j Dios ma qe' nk'u'je, ex kukx kjawil nnimsa'ne tb'i, porke a Ndiose ex a klol weye.

⁶Mer ik tza'n minti'tl wipune. Kyja'tzun nim in chin ximane ti'ja max ttzi nima Jordán ex max twi witz Hermón ex twi witz Mizar.

⁷Kyuj qe tqan xaq ma' kyxe' in b'injtz tq'ajq'ajel a' nne'x tilj twi xaq in julun wen; aju nintz a' in tzaj tq'o'na, ma chin kyaje tjaq' ex ma tz'ex wib'aje.

⁸In tzaj tq'o'n Qman t-xtalb'il weye q'ijl, ex qonik'an in tzaj tq'o'n jun b'itz tu'n nb'itzane, ex in chin kub'sane twitz Dios aju q'ol nchwinqlale.

⁹In xi nma'ne te Dios aju klol weye: ¿Tiqu'n ma chin ele ti'j tk'u'ja? ¿Tiqu'n in chin b'isune ex in chin yajlanjtze kyu'n qe aj q'oj wi'je?

¹⁰Kyuk'ix qe nb'aqile in che chyo'n tu'n kyxmayb'il qe aj q'oj wi'je, ex kukx in kyma'n weye: ¿Jatum ta' Tdiosa?

¹¹¿Tiqu'n in chin b'isune? ¿Tiqu'n in tzaj b'aj nk'u'je? O'kx ti'j Dios ma qe' nk'u'je, ex kukx kjawil nnimsa'ne tb'i, porke a Ndiose ex a klol weye.