Read kumam Salmos 44 Bible Online

Salmos 44 - kumam bible

Salmos 44

¹B'itz kyu'n qe tiyjil Coré Nman Dios, tu'n qẍkyine o qb'iye, o tzaj kyma'n qe qmane qeye ti'j ju tb'inchaya tuj q'ij tej kyten qe qxe'chele, tuj tq'ijlalil ojtxi:

²tu'nx tq'ab'a e ex tlajo'na qe xjal mya okslal ti'ja, kub' tq'o'na kycastiw qe nasyon, ex atzun e kub' tq'o'na qe qxe'chele tuj kytx'otx'.

³Mya tu'n kyex kyq'ab' ex mya tu'n kyex kyspad e kamb'an; mya kyu'nx o tzyet aju tx'otx'. O tzyet tu'n tipumala ex tu'n tq'ab'a ex tu'n t-xtalb'ila kyib'aj, tu'nju k'ujla'n qe tu'na.

⁴Aya nreye. Aya Ndiose. Tu'na o kamb'an aju tnam etzan tu'na.

⁵Noq tu'na o kub' kyi'j qe aj q'oj qu'ne, tu'n tipumala e kub' tz'aq twitz tx'otx' qeju e ok tzoqpaj qi'je.

⁶Ex mlay tz'ok qe' nk'u'je ti'j xob'l plech q'i'n wu'ne, ex mlay chin kamb'ane tu'nju nspadiye;

⁷tu'na kub' kyi'j qe aj q'oj qu'ne, ex tu'na kub' kych'ixwi qeju in che ik'un qi'je.

⁸Noq ti'ja in qo tzalaje Qman Dios, ex kukx kjawil qnimsa'ne tb'iya.

⁹Ex ma qo el tik'una; ex ma kub' tq'o'na qch'ixwiye. Ex minti'tl in b'eta kyuk'il qsoldadiye ok kyex tuj q'oj.

¹⁰Tu'nju minti' ma tz'onina quk'ile ma qo el oqe kywitz qe aj q'oj qi'je; ex qeju in che ik'un qi'je in xi kyelq'a'n aju at qeye, ex in xi kyi'n noq alkye kyaj.

¹¹Ma qo'x tq'o'na tuj kyq'ab' ik tza'n jun ẍne'l in xi q'i'n tu'n tpon jatum tu'n tkub' b'yo'n; ex ma qo b'aj t-sputuna kyxol qe xjal mya okslal qe ti'ja;

¹²puro barat ma txi tk'a'yina ju tnam etzan tu'na, ex minti' jun ma tkamb'aya ti'j tu'nju ma txi tk'a'yina.

¹³Tu'na ma tzaj qch'ixwiye kywitz qe qvesine, ma qo oke te tzeb'l ex te xmayb'il kyu'n qeju txolin kyten qi'jele.

¹⁴Tu'na in che xmayin qi'je qe xjal mya okslal ti'ja; ex ok qok ke'yine kyu'n, in xi kyyukun kywi' te xmayb'il qeye.

¹⁵Tkyaqil q'ij in tzaj nch'ixwiye; ex tu'n nch'ixwiye xi wewan nwitze,

¹⁶tu'n kyyol qeju in che yasun ex in che ilin wi'je, ex tu'n kylaj qe aj q'oj ex qeju kyaj tu'n t-xelin wi'je kyu'n.

¹⁷Ma tzaj jlu qi'je mya tu'nju mawt tzik' tna'njtza qu'ne. B'ajx qo el jolpaje ti'j ju yol o kyaj b'ant ti'j tu'na.

¹⁸Minti' in kub' qximane tu'n tkyaj qkoline, ex minti' ma che kyaj qq'o'ne qe tb'eya.

¹⁹Atzun teya ma qo naje tu'na kyuj qe lugar tzqij tx'otx' minti' kynajb'il xjal tuj. Ma qo kub' tq'o'na tjaq' jun qlolj xob'ajilxix.

²⁰Noqwit ma tzik' tna'njtza qu'ne, Dios, ex noqwit ma qo k'ulune twitz junxitl dios,

²¹mawtlo tila, porke nne'l tnik'a ti'j aju at tuj ewaj tuj tanmi xjal.

²²Ex noq tu'n tlaja kukx nne'lje' qi'je tu'n qkub' b'yo'ne; in qo ok q'o'ne ik tza'n qe ẍne'l in che kub' b'yet.

²³¿Tiqu'n nnik' tana, Nman? Q'i'mel twatla, q'i'mel twatla. Mi'n qo el tik'una te jumajx.

²⁴¿Tiqu'n in xi tewan tib'a? ¿Tiqu'n ma tzik' qna'njtze tu'na? Nimxix in qo yajlanjtze ex ato'ye tuj b'is.

²⁵Ma b'aj qipune ex ma tzaj qb'ise ex lu qximlale palch twitz tx'otx'.

²⁶We'ktza, tzaja onil qeye ex qo tkloma tu'n tk'ujlalila ma'xix.