Read kumam Salmos 45 Bible Online

Salmos 45 - kumam bible

Salmos 45

¹B'itz kyu'n qe tiyjil Coré Tuj wanmiye in che jatz qe yol tb'anilxix. Aju ntzi'ye ik tten ik tza'n jun lapis in ajb'en tu'n jun xjal b'a'nxix tz'ib'an. Kxel nb'itzane jun nb'itze twitz ju rey.

²O'kxku aya tb'anilxix kyxol kykyaqil xinaq. Tb'anilxix kykyaqil qe yol in tma'na. Kyja'tzun te jumajx ma kub' ky'iwla'na tu'n Dios.

³Q'onka t-spadiya tk'u'ja, aya kyuw tk'u'j tuj q'oj. Q'onk tajwalila in qoptz'aj wen.

⁴Tjaxa tuj carwaj te q'ojb'il ex txi'ya tu'n tkamb'ana, tz'ok tilil tu'na tu'n tkyuwsanjtz ju yol axix tok ex tu'n t-xi b'inchet kyi'j qe xjal mans qe. Tu'n tb'anq'ab'a che b'antel qe b'inchb'en ma'xix kyxilen.

⁵Ok che b'el tz'aq qe tnam twitza ok tkub' kyi'j tu'na, aya rey; qe tplecha puro tz'u'p kywi' ex in che'x xuyl tuj kyanmi qe aj q'oj ti'ja.

⁶Aya Dios, aju tkawb'ila kukx kyjel ten te jumajx tuj tkyaqil tab'q'iyil ex tuj tumelxix in kawina.

⁷In tzalaja ti'j ju tz'aqlxix ex nne'l tik'una aju mya b'a'n. Kyja'tzun ma jaw sk'o'na tu'n Dios aju Tdiosa, ex mas ma tzalaja tu'n kywitz qe txqantl tuk'ila.

⁸Tkyaqil t-xb'aluna k'ok'j ti'j tu'n perjum nne'l ti'j tze' mirra, ex ti'j tze' áloe ex ti'j tze' canela; ex in tzalaja tu'n tq'ajq'ajel kywi kitar kyuj tja rey lo'tzin marfil twitz kycajonil te tujxi.

⁹Kyxol qe xu'j at kyoklen ate' ttxlaja, ate' qe kyme'jel rey; ex tuj tb'anq'ab'a, atzun tkub'sa'n aju t-xu'jila toksa'n q'an pwaq mas tb'anil ti'j.

¹⁰B'intza nme'jel, q'onka kwent ti'j aju kxel nma'ne teya: Q'i'mela ti'j tk'u'ja qeju ate' tuj tja tmana ex qe t-xjalila.

¹¹Ma pon tk'u'j rey ti'ja tu'nju tb'anilxix ke'yina; nimana te, tu'nju atzun tajwila.

¹²Qe xjal aj Tiro kyuk'ix qe xjal q'inun ate' tuj tnam, ktzajel kyq'o'n oyaj teya tu'n kykamb'ante t-xtalb'ila.

¹³Tb'anilxix ke'yin tme'jel rey tokx tuj tja. Aju t-xb'alun tok puro q'an pwaq twitz.

¹⁴Tuk'il t-xb'alun in qoptz'aj wen kxel q'i'n twitz rey, ex kyuk'ix qe q'apoj aqeju tuk'il, che okex tuk'il.

¹⁵In che okx q'i'n tuk'il nim tzalajb'il; ex tuk'il tzalajb'il in che okx tuj tja rey.

¹⁶Qe tky'ajala, Tat Rey, che okel te kawil ik tza'n qe t-xe'chela, ex che okel tq'o'na te kawil tuj tkyaqil twitz tx'otx'.

¹⁷Waje tu'n ttzaj na'na kyu'n kykyaqil k'loj xjal che ul itz'j te tib'ajxi, kyja'tzun kjawil nimsa'na kyu'n qe tnam tuj tkyaqil tab'q'iyil te jumajx.