Read kumam Salmos 49 Bible Online

Salmos 49 - kumam bible

Salmos 49

¹B'itz kyu'n qe tiyjil Coré Kyq'ontze kywi'ye ti'j jlu, aqeye xjal najl tuj tkyaqil twitz tx'otx',

²tza'nx qe q'inun ikx qe meb'a, ex tza'nx qeju ma' kyoklen ikx qeju ch'in kyoklen.

³Chin yolile ti'j jun yol at tnab'l, kxel nchik'b'a'ne aju ximb'etz ma' t-xilen:

⁴k'okel nq'o'ne nwi'ye kyi'j qe yol in kyq'o'n xnaq'tzb'il, ex kxel nchik'b'a'ne aju yol kyuw tu'n tel kynik' xjal ti'j, ok tok nq'ajtza'ne chnab' arpa.

⁵¿Tiqu'n chin xob'ile ok tul kanun tq'ijlalil mya b'a'n, ok tb'aj txolin wi'je kyu'n aj q'oj wi'je?,

⁶aqeju nno'k qe' kyk'u'j ti'j kyq'inumab'l ex in jaw kyniman kyib' tu'nju nim at kye.

⁷Pero mi jun xjal jaku b'ant tklonte jun tuk'il ex mlay b'ant t-xi tchjo'n te Dios tu'n tklet.

⁸Maske at nim tpwaq, pero mlay laq'et tchwinqlal tuk'il tu'n,

⁹tu'n tanq'in te jumajx ex tu'n mi'n tkyim.

¹⁰Porke b'a'n qu'n kykyaqil in che kyim, tza'nx qeju at kynab'l ikx qeju minti' kynab'l, ex aju kyq'inumab'l in kyaj ten te juntl.

¹¹Maske tz'ok kyq'o'n tb'i kytx'otx' ik tza'n kye kyb'i, pero atzun che tel kyxol qe kyimni te jumajx.

¹²Maske at nim tq'inumab'l jun xjal, pero mya tu'n jlu mi'n kyim; ikx kymel ik tza'n in che kyim qe txkup.

¹³Kyja'tzun, che najel qeju nno'k qe' kyk'u'j kyi'jx, kyuk'ix qeju lepch qe kyi'j ex in che tzalaj ti'j kyyol.

¹⁴A kamik pastor kyi'j qe xjal lu, ex in che'x ẍaqlu'n tu'n tuj kynajb'il kyimni mer ik tza'n ẍne'l. Ok ttzaj t-xe kya'j kb'el kyi'j kyu'n qeju tz'aqlxix, ex kyja' tb'aj kyipun ex atzun che pol najal tuj kynajb'il kyimni.

¹⁵Pero ate Dios kolol wi'je tuj tipumal kamik, ex chin xel q'i'ne tu'n, tu'n ntene tuk'il.

¹⁶Mi'n tzaj tb'isa qa at jun xjal ma tz'ok te q'inun ex mas b'a'n nno'k ke'yin tja tu'n tq'inumab'l,

¹⁷ex ok tkyim mi jun ti'xti kxel ti'n, ex mlay txi lpe' tq'inumab'l ti'j tuj kynajb'il kyimni.

¹⁸Maske nim in tzalaj akux itz'x tzalu twitz tx'otx', ex maske in che yolin xjal b'a'n ti'j tu'nju at tq'inumab'l,

¹⁹pero kpol tq'ijlalil tu'n tkyim, ex mlay tz'ok tke'yin juntl maj t-spik'umal q'ij.

²⁰Maske at nim tq'inumab'l jun xjal, pero mya tu'n jlu mi'n kyim; ikx kymel ik tza'n in che kyim qe txkup.