Read kumam Salmos 52 Bible Online

Salmos 52 - kumam bible

Salmos 52

¹A jlu o tz'ib'anjtz tu'n David tej tpon Doeg aju aj Edom q'malte tqanil te Saúl, qa otoq tzul David tuj tja Ahimelec. ¿Tiqu'n in jaw tniman tib'a ti'j ju mya b'a'n in tb'incha'na, aya at tipumal? Kukx tten tk'ujlalil Dios.

²O'kx in ximana ti'j tu'n tb'inchanteya mya b'a'n; ik tten ttzi'ya ik tza'n jun kchil b'anin ttzi' porke nim in nik'ana yol.

³Mas in tzalaja ti'j ju mya b'a'n twitz ju b'a'n, ex mas in tzalaja ti'j ju nik'aj yol twitz ju yol ax tok.

⁴Mas in tzalaja kyi'j yol in che naj xjal kyu'n; jawni sb'una tu'n ttzi'ya.

⁵Tu'ntzun jlu knajela te jumajx tu'n Dios: ktzajel tzyu'na tu'n ex k'elex q'i'na tu'n tuj tjaya; knajela tu'n kyxol xjal.

⁶Ok kyila' qe xjal tz'aqlxix jlu ex ktzajel t-xob'il kyi'j; che okel ten xmayil ti'j ju xjal lu, ex ok kyma':

⁷Lutzun xjal lu, minti' qe' tk'u'j ti'j Dios tu'n tklet; o'kx q'uql tk'u'j ti'j tq'inumab'l ma'xix, ex kukx o b'inchan mya b'a'n, che chilo.

⁸Atzun weye, ik ntene ik tza'n jun tze' olivo cha'x tuj tja Dios; te jumajx kukx q'uql nk'u'je ti'j tk'ujlalil.

⁹Nman Dios, kukx kxel nq'o'ne chjonte teya ti'j ju ma tb'inchaya; kqeb'el nk'u'je ti'ja kywitz qe nimal teya, tu'nju puro b'a'na.