Read kumam Salmos 55 Bible Online

Salmos 55 - kumam bible

Salmos 55

¹Nman Dios b'intza aju nna'j Diose; mi'n noq tzaj tb'i'na nkub'sb'ile twitza.

²Chin tb'intza ex chin ttzaq'wentza; ma b'aj nk'u'je tu'nju b'is in tzaj wi'je.

³In chin jaw lu'lune tu'n tq'ajq'ajel kywi' aj q'oj wi'je ex tu'nju yajb'il weye kyu'n qe xjal mya b'a'n. Kyu'n ma tzaj yajb'il wi'je; in che ok tzoqpaj wi'je tuk'il kytx'u'jil.

⁴In putin wanmiye ttzi nxu'ke; ma tzaj t-xob'il kamik wi'je.

⁵Ma tzaj nimxix t-xob'il wi'je; in chin lu'lune tu'n nxob'ile.

⁶Ex in nma'ne kyja': Noqwit at nxik'e ik tza'n jun paloma, jakulo chin el putine ex jakulo chin ojlane.

⁷Jakulo chinx oqe najchaq wen; jakulo chin kyaj tene najal tuj lugar minti' kynajb'il xjal tuj.

⁸Juratlo jaku chinxe klol wib'e ok ttzaj xob'ajil tu'n kyq'iq' jb'al.

⁹Xitun kub'a qe Nman, tzpet-san b'aja kyyol, porke o'kx in wile k'ixb'isab'l ex ik'b'il tuj tnam,

¹⁰q'ijtl ex qonik'an txolin kyten ti'jele tnam. O'kx mya b'a'n ex yajb'il at tuj;

¹¹nojni qe cay kyu'n qe xjal k'ixb'isal ex sb'ul.

¹²Noqwit jun aj q'oj ma b'inchante mya b'a'n wi'je, mawtlo tzik'x wu'ne; ex noqwit jaw ti'n tib' wi'je aju nne'l ik'unte weye, mawtlo tz'el wewan wib'e twitz.

¹³Ex aju ma jaw ti'n tib' wi'je, akuya aju wuk'ile ex mejorxix wamiwoye,

¹⁴tuk'ila ok njunin wib'e tuj tja Dios tu'ntzun qyolin qamiwxix qib', ex tuk'ila o chin b'ete kyxol nimku xjal.

¹⁵Kuchiwt minab'en che kyim qe aj q'oj wi'je. Itz'xwit qe ok kyku'pun tuj kynajb'il kyimni, porke o'kx mya b'a'n at tuj kyanmi.

¹⁶Atzun weye ok chin kub'sale twitz Qman Dios; ate kklolte weye.

¹⁷Te prim, te qale ex te qonik'an, chin jawil ayayane ex chin jawil oq'e, ex ktzajel tb'i'n tq'ajq'ajel nwi'ye,

¹⁸chin kletele tu'n ok tok q'oj wi'je; maske at nim aj q'oj wi'je chin kletele tu'n.

¹⁹Ate Dios aju in kawin te jumajx, chin tzajel b'i'ne tu'n ex kb'el kyi'j qe aj q'oj wi'je tu'n, porke minti' in b'aj kych'expu'n kymod, ex minti' in che xob' twitz Dios.

²⁰In jaw kyi'n kyib' kyi'j qe kyamiw; minti' in japun kyu'n aju yol in xi kytziyan te kymojb'ab'l kyib'.

²¹Tb'anilxix kyb'inx qe yol in che ajb'en kyu'n, atzunju kyximb'etz o'kx kyaj tu'n kyq'ojin. Tb'anilxix kyb'inx qe yol in che ajb'en kyu'n, ex ik kyten ik tza'n spad b'anin ttzi'.

²²Q'onkja qe tb'isa tuj tq'ab' Qman, ate ktzajel q'onte tipuna tu'n tik'x tu'na, mlayx taq' amb'il tu'n tkub' tz'aq aju xjal b'a'n niman te.

²³Nman Dios, tu'na che pol tz'aq qe b'yol xjal ex qe nik'al yol max t-xe'pun kynajb'il kyimni, mlay taq'a amb'il kye tu'n kyanq'in nim q'ij. Atzun weye q'uql nk'u'je ti'ja.