Read kumam Salmos 56 Bible Online

Salmos 56 - kumam bible

Salmos 56

¹B'itz tu'n David tej ttzyet kyu'n aj Filisteo tuj tnam Gat Q'aq'antz tk'u'ja wi'je Nman Dios ex lepcho'k qe xjal wi'je tu'n nkub' kyb'yo'n. Ex tkyaqil q'ij in che ok tzoqpaj wi'je ex in chin b'aj yajla'ne kyu'n.

²Tkyaqil q'ij lepcho'k qe aj q'oj wi'je tu'n nkub' kyb'yo'n; nimku kyb'aj qeju in che ok tzoqpaj wi'je tuk'il kynimb'il kyib'.

³Qa ma tzaj nxob'ile, nno'k qe' nk'u'je ti'ja.

⁴Q'uql nk'u'je ti'j Dios ex in jaw nnimsa'ne tyol; q'uql nk'u'je ti'j Dios ex minti' in chin xob'e. ¿Ti jaku tb'incha xjal wi'je?

⁵Tkyaqil q'ij in chin yajlanjtze kyu'n tu'n yol; o'kx in che ximan ti'j tu'n kyb'inchante mya b'a'n wi'je.

⁶Noq jachaq in xi kyewan kyib' tu'n ntzyete kyu'n, in che ke'yin wi'je jatum in chin b'ete, in che ayon wi'je tu'n nkub' kyb'yo'n.

⁷Q'on kub'a kycastiw ti'j kyb'inchb'en mya b'a'n. Nman Dios, xitun kub'a qe tnam tu'n tq'oja.

⁸Q'i'n tajlal tu'na jte' majxi chin el oqe; in jaw ti'na teyle junjun txut ta'l nwitze. ¿Myapetzun tz'ib'an qe jlu tu'na tuj u'j at tuk'ila?

⁹Che elel oq qe aj q'oj wi'je ok t-xi nqanine onb'il te Dios. B'a'n wu'ne at Dios wuk'ile te onil weye.

¹⁰Q'uql nk'u'je ti'j Dios ex in jaw nnimsa'ne tyol; q'uql nk'u'je ti'j Qman ex in jaw nnimsa'ne tyol.

¹¹Q'uql nk'u'je ti'j Dios ex minti' in chin xob'e. ¿Ti jaku tb'incha xjal wi'je?

¹²Aju yol xi ntziyane teya Nman Dios, kjapunel wu'ne tuk'il aq'b'il chjonte teya,

¹³tu'nju ma chin klete tu'na te kamik, ma chin klete tu'na tu'n mi'n nkub' tz'aqe, tu'ntzun nb'ete twitza tuj spik'un kyxol qe xjal itz'.