Read kumam Salmos 59 Bible Online

Salmos 59 - kumam bible

Salmos 59

¹A jlu o tz'ib'anjtz tu'n David tej t-xi t-sama'n Saúl qe xjal tja David tu'n tkub' b'yo'n kyu'n Nman Dios, chin tkloma tuj kyq'ab' aj q'oj wi'je; chin klet-xwita tu'na tuj kyq'ab' qeju in jaw kyi'n kyib' wi'je.

²Chin tkloma tuj kyq'ab' xjal b'inchal mya b'a'n, chin tkloma tuj kyq'ab' qe b'yol xjal,

³tu'nju at qe xjal nimxix kyipumal noq in che ayon ti'j tu'n nkub' kyb'yo'n.

⁴Nman, b'ajx jaw wi'n wib'e kyi'j ex b'ajx chin b'inchane il; minti' o b'ant jun mya b'a'n wu'ne kyi'j, ex maske ikju, pero nno'k tilil kyu'n tu'n kyok tzoqpaj wi'je. Q'i'mel twatla. Tzaja onil weye ex ke'yinxa aju in b'ant kyu'n.

⁵Aya Nman Dios aju Dios Tajaw Tkyaqil, aju Dios kye aj Israel, q'i'mel twatla, ex q'on kub'a kycastiw qe xjal mya okslal qe ti'ja; mi'n tzaj tz'e'y tk'u'ja kyi'j qe b'inchal mya b'a'n, aqeju in che ok meltz'aj wi'je.

⁶Qonik'an in che ajtz meltz'aj, in che qawin ik tza'n qe tx'yan, ex noq in che b'etje' tuj tnam.

⁷Nim in che yasun ex in che xob'tzan, aju kytzi' mer ik tza'n spad in che naj xjal tu'n, ex in kyma'n: Mi a'l jun in b'in qi'j, che chi.

⁸Atzun teya Nman in tze'na kyi'j; in xmayina kyi'j qeju mya okslal qe ti'ja.

⁹Tuk'ila in nklon wib'e Nman Dios, porke aya q'olte wipumale ex aya kolol wi'je.

¹⁰Aju Dios in k'ujlante weye tzul onil weye; kwila'ye ok tkub' kyi'j qe aj q'oj wi'je tu'n.

¹¹Mi'n che kub' tb'yo'n naja qe, tu'ntzun mi'n tik' tna'njtz kyu'n qe ntanmile; sputun b'aja qe tu'n tipumala, ex che najxwit tu'na. Aya Nman kolol qi'je.

¹²In che b'inchan il ti'j tkyaqilju in kyma'n; che tpresin okxa qe tu'nju kynimb'il kyib' ex tu'nju yol in b'aj kyjuramentin mya ax tok.

¹³B'yo'n kub'a qe tu'n tq'oja, b'yo'n kub'a qe tu'n mi'n kukx kyanq'in; tu'ntzun tel kynik' xjal ti'j qa ate Dios in kawin kyib'aj aj Israel ex tuj tkyaqil twitz tx'otx'.

¹⁴Ok kyajtz meltz'aj te qonik'an in che qawin ik tza'n qe tx'yan, ex in che b'etje' tuj tnam,

¹⁵in che b'etje', in che jyon kywa, in che jaw xo'jin tu'nju minti'xix in noj kyk'u'j.

¹⁶Atzun weye, chin b'itzale teya te prim; chin b'itzale ti'j tk'ujlalila ex tipumala, tu'nju aya jun kolb'il weye ex tuk'ila in pon nklon wib'e ok ntene tuj yajb'il weye.

¹⁷Teya che xel nb'itzane qe b'itz, Nman Dios, porke aya q'ol wipumale ex aya kolb'il weye; aya Dios aju in k'ujlante weye.