Read kumam Salmos 60 Bible Online

Salmos 60 - kumam bible

Salmos 60

¹Aju b'itz lu kub' ttz'ib'an David tej tq'ojin tuk'il Aram-naharaim ex tuk'il Aram te tnam Soba, ex ajtz meltz'aj Joab ex e kub' tb'yo'n kab'laj mil xjal te tnam Edom tuj chq'ajlaj Atz'an tb'i. Nman Dios, tu'n tq'oja ma qo kyaj tkolina, ma kub' qi'je tu'na; q'ontza qipune juntl maj.

²O tzaj lu'lun tx'otx' tu'na ex o tz'el k'ab'chaj; jpun oka juntl maj qe tpa'xil, porke nib'an tb'aj xitj.

³Aju tnam etzan tu'na ma tz'ok tq'o'na tuj malb'il kyuwxix, mer ik tza'n vin ma tzaj tq'o'na qeye ex ma qo pich'jeye tu'n;

⁴ja'lo q'onxa jun techal kye qeju in che niman teya, tu'ntzun kykolpaj kye qe plech in che tzaj xo'n.

⁵Qo ttzaq'wentza, ex qo tkloma tu'n tipumala. Kolina kyi'j qeju in che tk'ujla'na.

⁶O tzaj tma'n Dios tuj tja xjan kyja': Tuk'il tzalajb'il kb'ajel npa'ne tuj piẍun aju tx'otx' Siquem, ex kb'ajel npa'ne ju chq'ajlaj Sucot.

⁷Aju tx'otx' Galaad ex ju tx'otx' Manasés weye qe; ate Efraín ik tten te weye ik tza'n jun pasb'il k'uxb'il tjax tuj nwi'ye; ate Judá ik tten te weye ik tza'n nvare tu'n nkawine;

⁸ate Moab ik tten te weye ik tza'n jun palangan jatum tu'n tel ntx'jo'ne nq'ab'e; ex tib'aj ju tx'otx' Edom kxel nxo'ne nxajb'iye te jun techal qa otoq tz'ok te weye; chin jawil sch'ine tu'nju otoq chin kamb'ane kyi'j aj Filisteo.

⁹¿Alkye kxel q'inte weye tuj tnam tok muro ti'j? ¿Alkye kxel ẍaqlunte weye tu'n npone max tuj Edom?

¹⁰Nman Dios, ma qo el tik'una; minti'tl nne'tza kyuk'il qe qsoldadiye.

¹¹Qo tonintza tu'n tkub' kyi'j qe aj q'oj qi'je, ex minti'x tajb'en aju onb'il kyu'n xjal.

¹²Noq tu'nju onb'il tu'n Dios ok qo kamb'al; ex tu'n kb'el kyi'j qe aj q'oj qu'n.