Read kumam Salmos 65 Bible Online

Salmos 65 - kumam bible

Salmos 65

¹B'itz tu'n David Qman Dios, b'a'n tu'n t-xi qq'o'ne chjonte teya tuj tnam Sión ex tu'n tjapun qu'ne aju o txi qtziyane teya,

²porke in tb'i'na aju qna'j Diose. Kykyaqil xjal in che ul tuk'ila.

³In kub' qi'je tu'nju qb'inchb'ene mya b'a'n, ex in kub' tnajsa'na qile.

⁴At nim tzalajb'il teju xjal in jaw t-sk'o'na ex in pon ti'na tuk'ila tu'n tten niqayin ttxlaja, ex tu'n tten tuj tjaya. Qo tzalajele tu'n tkyaqilju b'a'n at tuj tjaya, aju tjaya xjan.

⁵Qman Dios aju klol qeye, in qo tzaj ttzaq'we'na tu'nju tb'inchb'ena ma'xix t-xilen ex tz'aqlxix; kykyaqil xjal twitz tx'otx' in qe' kyk'u'j ti'ja, ax ikx qeju najl jlajxi mar.

⁶Tu'n tipumala tzyu'n qe nmaq witz tu'n mi kyyukch.

⁷Tu'na in q'ajen tq'ajq'ajel mar ok ttzaj pulin, ex tu'na in che mayet qe xjal ok kyjaw tilj ti'j jun yol;

⁸ax ikx qe xjal najl tuj tx'otx' najchaq in tzaj tchi kyi'j tu'nju tb'inchb'ena ma'xix t-xilen; in che sch'in xjal tu'n tzalajb'il ti'ja tuj jun pak' ttxa'n tx'otx' ax ikx tuj juntl pak'.

⁹Kwentin ju tx'otx' tu'na, ex in tzaj tq'o'na jb'al tib'aj tu'ntzun mejor ttzaj ch'iy awal tuj; tu'na in che ch'iy qe tq'ab' xaq tu'ntzun tch'iy twitz awal. Kyja'tzun tten in b'aj tb'incha'na ju tx'otx'.

¹⁰Tu'na in b'aj ta'lina aju tx'otx' ch'okimaj, ex tu'na in noj kyxol qe surc tu'n a'; tu'n jb'al in tzaj tq'o'na in q'uynix tx'otx' ex in kub' tky'iwla'na tu'ntzun ttzaj tq'o'n twitz awal.

¹¹In tzaj tq'o'na t-xtalb'ila tuj enter ab'q'i, ex noq jatum in b'eta, atzun in chmet nim twitz awal.

¹²Ma ch'iy nim cha'x k'ul tuj tzqij tx'otx' ex puro mejor in che kyaj qe witz, mer ik tza'n otoq tz'ok jun kyxb'alun ak'aj.

¹³In noj tuj chq'ajlaj kyu'n alumaj, qe tx'otx' ttzi a' nojni twitz tu'n triw; kykyaqil in che b'itzan ex in che sch'in tu'n tzalajb'il.