Read kumam Salmos 66 Bible Online

Salmos 66 - kumam bible

Salmos 66

¹Jun b'itz Che b'itzane te Dios tuk'il tzalajb'il aqeye najl tuj tkyaqil twitz tx'otx';

²che b'itzane tu'n tjaw kynimsa'ne tb'i tb'anilxix; kyq'onxe chjonte te ex kynimsa'n jawe tb'i.

³Kymanxe te Dios kyja': Ma'xix kyxilen qe tb'inchb'ena. Noq tu'n tipumala ma'xix che b'el tz'aq twitza qe aj q'oj ti'ja.

⁴Kykyaqil xjal che b'el ẍmeje' k'ulul twitza, ex che b'itzal tu'n tjaw nimsa'n tb'iya.

⁵Kytzaje ke'yilte aju taq'unb'en Dios, aqeju b'inchb'en ma'xix kyxilen o tb'incha kyi'j qe xjal:

⁶Aj tzqij mar tu'n, ax ikx e jik'x qe qxe'chel tuj nima Jordán tu'n kyqan; qo tzalajxix ti'j Dios.

⁷In kawin te jumajx tuk'il tipumal; tok tkwent kyi'j qe nasyon tu'ntzun mi'n tjaw kyi'n kyib' kyi'j qeju mib'an che b'in.

⁸Kykyaqile aqeye txqantl nasyon kyq'onxe chjonte te Qdiose, che b'itzane tu'n tjaw nimset tb'i.

⁹Porke noq tu'n kukx itz'x qo'; ex tu'n minti' ma qo jaw tz'aq.

¹⁰Qman Dios, ma qo ok tq'o'na tuj malb'il, ma qo b'aj t-saqsa'na ik tza'n saq pwaq.

¹¹Ma qo tzyete tu'na tuj k'ob'il; ex ma kub' tq'o'na jun iqtz alxix qib'aje.

¹²Xi tq'o'na amb'il tu'n tkub' qi'je kyu'n aj q'oj; mer ik tza'n ma qo ik'e tuj a' ex tuj q'aq', ex te b'ajsb'il ul ti'na qo'ye tuj jun lugar tb'anilxix.

¹³Ok chin okexe tuj tjaya ex che b'el npatune qe oyaj twitza; kyja'tzun kjapunel wu'ne aju yol o txi ntziyane,

¹⁴aju yol xi ntziyane teya tej atintoqe tuj xob'ajil.

¹⁵Che b'el npatune tib'aj t-altara qe alumaj ulni kynab'l; ex che xel nq'o'ne teya qe tor ex qe tman chip tuk'ix t-sib'el ẍne'l.

¹⁶Kytzaje kykyaqile aqeye in che xob' twitz Dios. Kyb'intze, kxel nma'ne kyeye aju ma tb'incha weye.

¹⁷Jaw tq'ajq'ajel nwi'ye tu'n nkub'sane twitz, ex jaw nnimsa'ne tb'i.

¹⁸Noqwit at nximb'etze mya b'a'n, minti'wtlo ma chin tzaj b'i'ne tu'n Qman;

¹⁹pero ma chinx b'i'ne tu'n ex ma tzaj tb'i'n nna'j Diose.

²⁰Nimanxwit te Dios, minti' ma tz'el tik'un nna'j Diose ex minti' ma kub' t-xk'a'yin tk'ujlalil weye.