Read kumam Salmos 68 Bible Online

Salmos 68 - kumam bible

Salmos 68

¹B'itz tu'n David Ok in jaw we' Dios kyi'j qe aj q'oj ti'j, b'i'x in che el sputj tu'n; ex qeju in che ik'un te b'i'x in che el oq twitz;

²in che kub' naj qe ik tza'n sib' tuj kyq'iq', in che el a'yix qe ik tza'n xkab' nno'kx q'ot tuj q'aq'; kyja'tzun tten in che naj qe xjal mya b'a'n twitz Dios.

³Atzun kye qeju tz'aqlxix in che tzalaj qe; in che noj tu'n tzalajb'il twitz Dios ex in che t'ikpaj tu'n tzalajb'il.

⁴Che b'itzane te Dios, che b'itzane tu'n tjaw nimset tb'i; kynimsa'n jawe aju in b'et tib'aj muj. Che tzalajxe ti'j Qman. Che tzalajxe twitz.

⁵Ate Dios najl tuj tja xjan, ate mamb'aj kye qe k'wa'l minti' kyman ex kytxu' ex kolol kyi'j qe meb'a xu'j;

⁶In tzaj tq'o'n Dios jun lugar jatum tu'n kynajan qeju kyjunalx ate'; in che etz ttzoqpi'n qeju kyokx pres ex in xi tq'o'n tzalajb'il kye; atzun kye qeju mib'an che b'in ok che najal tuj tx'otx' mib'an tzaj awal tuj.

⁷Nman Dios, tej tkub' neja kywitz qe xjal etzan tu'na ex tej tb'eta tuj lugar minti' kynajb'il xjal tuj,

⁸jaw lu'lun tx'otx', tzaj jb'al twitz kya'j, aju witz Sinaí jaw lu'lun twitz Dios, aju Dios kye aj Israel.

⁹Nman Dios, tu'na tzaj nimxix jb'al tu'ntzun tok juntl maj tipun aju tzqij tx'otx' etzan tu'na.

¹⁰Qe xjal etzan tu'na axtzun e kub' ten tuj, atzun teya Nman Dios, noq tu'n t-xtalb'ila xi tq'o'na kye qe meb'a aju at tajb'en kye.

¹¹Tzaj tq'o'n Qman jun tnej yol ex nimku xu'j e ok ten q'malte tqanil:

¹²E je'l oq qe rey kyuk'ix qe kysoldad. Qe xu'j otoq che kyaj ten ja b'aj kysipan aju otoq tz'el q'i'n kye aj q'oj,

¹³atzun kyeye akux koẍl qeye tuj kype'n ẍne'l, ok ttx'otx'il saq pwaq kyi'j qe t-xik' paloma. Ex ok ttx'otx'il q'an pwaq mas tb'anil kyi'j qe ttzmal.

¹⁴Tejtzun kyel oq qe rey tu'n Dios aju Tajaw Tkyaqil, saq ok twi witz Salmón tu'n.

¹⁵Ma' kywa'l qe witz tuj tx'otx', ex ma'xix kyjawsa'n.

¹⁶Aqeye witz ma' kywa'le, ¿tiqu'n in tzaj tlo'ch kyk'u'je ti'j ju witz jaw t-sk'o'n Dios tu'n tnajan twi'? Atzun knajal Qman te jumajx.

¹⁷Tuj milin ate' qe tcarwaj Dios te q'ojb'il; tzaj twi' witz Sinaí kyuk'ix qe tcarwaj ex ul tuj tja.

¹⁸Nman Dios, ma jaxa twi' jun witz ma' twa'l, ma che jax ti'na qe pres; o tk'ama chojb'il tzaj kyq'o'n xjal, ex kyuk'ixpe qe xjal mib'an che niman tzaj kyq'o'n chojb'il teya Nman, tu'ntzun tnajana kyxol.

¹⁹Nimanxwit Qman aju Qdios ex klol qe, tu'nju teyle junjun q'ij in xi ti'n aju qiqatz.

²⁰Ate Qman Dios b'a'n kolin, ex jaku qo klet tu'n te kamik,

²¹kb'el tpa'n Dios kywi' aj q'oj ti'j, tuk'ix kywi' qeju kukx kyb'inchan il.

²²O tma Qman kyja': Ok k'ajetz wi'ne tuj tx'otx' Basán; ok k'ajetz wi'ne tuj mar ma' t-xe',

²³tu'ntzun tnoj kyi'j tqana tu'n kychk'el qe aj q'oj ti'ja ex tu'n t-xi kyk'a'n qe ttx'ya'na.

²⁴Nman Dios, aya Ndiose ex Nreye, tuj tjaya xjan q'ancha'l qe xjal txolin kyten in kub' kyik'sa'n ninq'ij te nimb'il teya.

²⁵Nejni qe b'itzal ex lepchix qe q'ajtzal chnab', ex tuj xolb'aj kyku'x qe tal q'apoj nno'k kyq'ajtza'n qe tampor ch'in.

²⁶Kyq'onxe chjonte kykyaqile te Qman Dios. Kyq'onxe chjonte te kykyaqile aqeye aj Israel.

²⁷Nejni Benjamín kywitz, aju mas ch'in, kyuk'ix nimku nejenel kye tiyjil Judá, kye tiyjil Zabulón ex kye tiyjil Neftalí.

²⁸Nman Dios, yek'untza tipumala ik tza'n o tb'inchaya qi'je ojtxi.

²⁹Max tuj tjaya ma' twa'l tuj Jerusalén, jatum in pon q'i'n oyaj teya kyu'n qe rey,

³⁰kawinxa tnam Egipto, aju ik tten ik tza'n qe txkup ate' tjaq' tqan ajlaj, ex ik tza'n qe tor ex qe tal tor tx'u'j qe, e tkub' kymansin kyib' twitza ex e ttzaj kyi'n saq pwaq; sputun ela qe xjal o'kx kyaj ti'j q'oj.

³¹Tuj Egipto che tzajel qe nejenel; kjawil kyyek'un kyq'ab' aj Etiopía twitz kya'j tu'n kyna'n Dios.

³²Che b'itzane te Dios aqeye tnam tuj tkyaqil twitz tx'otx', kyb'itzanxe b'itz te Qman,

³³aju in b'et twitz kya'j, aju kya'j at te jumajx. Kyb'inxe tq'ajq'ajel twi', aju tq'ajq'ajel twi' nimxix tipumal.

³⁴Tz'elx kynik'e ti'j tipumal Dios; aju tajwalil tkub' kyib'aj aj Israel, aju tipumal in japun kanun twitz kya'j.

³⁵Ma'xix t-xilen Dios tuj tja xjan; aju Kydios aj Israel in tzaj tq'o'n kyipumal qe xjal etzan tu'n. Nimanxwit tb'i Dios.