Read kumam Salmos 69 Bible Online

Salmos 69 - kumam bible

Salmos 69

¹B'itz tu'n David Chin tkloma Nman Dios ex ch'ix nkyaj mulq'aje tjaq' a';

²ch'ix nxi'ye tuj sob'an ma' t-xe', ex minti' jatum tu'n tkub' nq'o'ne nqane. Ma chin ku'pun tz'aqe max t-xe' a', ex ma chinx iqane tu'n tipumal.

³Ma tzqij tuj nqule tu'nju nim in chin sch'ine; ma tzaj chyo'n tuj nqule, ex ya ma che sikt qe nwitze tu'nju nim in chin ayone ti'j Ndiose.

⁴Qeju noqx gan in che q'ojl wi'je mas nim kyajlal twitz tajlal ttzmal nwi'ye, ma chmet kyb'aj qeju in che ik'un weye ex qeju noqx gan kyaj tu'n nnaje, in kyma'n weye tu'n tchjet aju minti' ma tz'el welq'a'ne kye.

⁵Nman Dios, tzqi'n tu'na qa minti' nnab'le ex mlay b'ant tewanjtz wile twitza.

⁶Nman Dios Tajaw Tkyaqil, kuchiwt mi'n tzaj kych'ixwi qeju q'uql kyk'u'j ti'ja tu'n tlaj ju wile; aya Dios kye aj Israel, kuchiwt mi'n tzaj kyb'is tu'n nlaje qeju tok tilil kyu'n tu'n kyjyon ti'ja.

⁷Noq tu'n tlaja in chin ok yaso'ne kyu'n xjal ex ma kyaqix nwitze tu'n nch'ixwiye;

⁸mer ik tza'n stranjer xjal ma chin ele tuj kywitz wermaniye, ex mer minti' ojtzqi'n nwitze kyu'n.

⁹Ma tzaj ta'w tuj wanmiye tu'n tlaj at nk'u'je ti'j tjaya, aju yasb'il kyu'n qeju in che yasun ti'ja ma kub' tz'aq wib'aje.

¹⁰Ok in chin jaw oq'e ex ok tkub' nyo'ne we'yaj, in che ok ten xmayil wi'je;

¹¹qa ma tz'ok nq'o'ne xb'alun ch'i'x twitz wi'je tu'nju in chin b'isune, kykyaqil in che ok ten tze'l wi'je.

¹²O'kx wi'je in che yolin xjal tuj plas, ex qe k'al q'e'n in xi kyb'itzan b'itz tu'n kyxmayin wi'je.

¹³Atzun weye Nman, in chin kub'sane twitza; Nman Dios chin tonintza ja'lo, chin ttzaq'wentza noq tu'nju at tk'ujlalila, chin tkloma tu'nju kukx in onina wi'je.

¹⁴Mi'n taq'a amb'il tu'n nkyaje tuj sob'an. Chin tkloma tuj kyq'ab' qeju in che ik'un weye; chin tkloma tu'n mi'n nxi'ye tuj a' ma' t-xe'.

¹⁵Mi'n taq'a amb'il tu'n nxi iqane tu'n a' q'i'n tipun wen, ex mi'n taq'a amb'il tu'n tok tjunin tib' a' wib'aje, aju in ku'x sutin.

¹⁶Chin ttzaq'wentza Nman, porke aya b'a'n ex nim tk'ujlalila, ke'yintza qine tu'nju nim tq'aq'b'il tk'u'ja.

¹⁷Mi'n chin el tik'una, aqine tmajena, ex chin ttzaq'wentz naja, porke atine tuj xob'ajil.

¹⁸Laq'etza wuk'ile ex chin tkloma; chin tkloma tuj kyq'ab' aj q'oj wi'je.

¹⁹B'a'n tu'na ma chin ok xmayine, ma chin ch'ixwiye ex ma chin ok yaso'ne; ojtzqi'n tu'na alkye qe aj q'oj wi'je.

²⁰Ma naj wanmiye woklen yaso'ne; ex b'i'x ma b'aj wipune. Ma chin jyone ti'j jun q'uqb'al nk'u'je tu'n ttzaj q'aq'an tk'u'j wi'je, ex minti' ma knet wu'ne.

²¹Okx kyq'o'n jun k'ul nim tk'ayil tuj nwaye, ex tej ttzaj txqet ti'j nk'u'je tzaj kyq'o'n vinagr te nk'a'ye.

²²Aju nintz wa'n nno'k kyu'n kyuk'il kyamiw, tz'okwit te jun k'ob'il kye.

²³Tz'okxwit sjumj ti'j kywitz tu'n mi'n tb'ant kyke'yin, ex kukxwit tzaj lu'lun kyqan.

²⁴Tzajxwit nim tq'oja kyi'j, ex tzajxwit ttx'u'jila kyi'j.

²⁵Tz'okwit kynajb'il minti' xjal kyuj ex mi jun xjal ten kyuj kyja xb'alun;

²⁶porke in che yajlan ti'j ju ma yajlanjtz tu'na, ex in che xmayin ti'j ju ma k'ixb'isanjtz tu'na, tu'nju at nim ta'w in tzaj ti'j.

²⁷Q'onxa mya b'a'n kyib'aj te t-xel ju mya b'a'n ma kyb'incha, ex mi'n kub' tnajsa'na kyil.

²⁸Q'i'n jatza kyb'i tuj tu'jil chwinqlal, ex mi'n ku'x tq'o'na kyb'i jatum tz'ib'an kyb'i qe tz'aqlxix.

²⁹Atzun weye yab' qine ex atine tuj yajb'il, chin twab'an jawe Nman Dios, ex chin tkloma.

³⁰Kxel nb'itzane tb'i Dios, kxel nq'o'ne chjonte te ex kjawil nnimsa'ne tu'n aq'b'il chjonte,

³¹ex mas jaku tzalaj Qman ti'j jlu twitzju tu'n t-xi q'ot jun tor te chojb'il, ex qa jun tal wakẍ at tkach ex at t-xpak'il tqan.

³²Che jawil tzalaj qe xjal ate' tuj b'is ok kyke'yinte ok tb'ant jlu. Qe' kyk'u'je ti'j Dios, aqeye in che jyone onb'il tuk'il,

³³porke in che tzaj tb'i'n Qman qe xjal meb'a, ex minti' in che el tik'un qe xjal etzan tu'n ate'kx tuj pres.

³⁴Aju kya'j ex tx'otx' tuk'ix mar, b'a'n tu'n t-xi kyq'o'n chjonte te Qman, kyuk'ix kykyaqil qeju najl kyuj,

³⁵ex kkletel ju tnam Sión tu'n Dios ex kjawil tb'incha'n juntl maj qe tnam tuj tx'otx' Judá.

³⁶Atzun che najal xjal ex che okel te tajwil. Aqe kyk'wa'l qe tmajen Dios che okel te tajwil ju tnam ex qeju in che tzalaj ti'j tb'i Dios ax che najal tuj.