Read kumam Salmos 7 Bible Online

Salmos 7 - kumam bible

Salmos 7

¹Aju b'itz lu xi tb'itzan David kyi'j qe tyol Cus aju tiyjil Benjamín Nman Dios, ti'ja q'uql nk'u'je; chin tkloma kywitz kykyaqil qeju in che yajlante weye.

²Porke ik kyten qe jlu ik tza'n qe b'alun; mya yajku chin b'aj paẍu'ne kyu'n ex mi a'l jun jaku tzaj kolol wi'je.

³Aya Nman Dios, ¿alkyetzun o nb'inchaye kyxol qe jlu? ¿Atpetzun jun mya b'a'n o nb'inchaye?

⁴¿Opetzun nb'inchaye mya b'a'n ti'j jun wamiwoye te t-xel b'a'n otoq tb'incha weye? Noq o'kx o klet wu'ne aju xjal noqx gan ok tq'on tib' te aj q'oj wi'je.

⁵Noqwit o nb'inchaye qe jlu, tuj tumelxwitlo ta' tu'n kyok lpe' qe aj q'oj wi'je tu'n ntzyete kyu'n, ex tu'n nkub' kyxo'n twitz tx'otx', ex tu'n nb'aj wab'ane kyu'n tuj quq.

⁶We'ktza tuk'il tq'oja Nman. We'kuya kywitz qe aj q'oj wi'je in che q'ojl wen. Ttzaja Nman, b'inchantza wi'je ik tza'n b'animaj tu'na.

⁷E tok kychmon kyib' kykyaqil nasyon twitza, ex atzun q'on kub'a tq'uqb'ila tu'n tkawina kyib'aj.

⁸Aya Nman, tu'na in che ok qe nasyon tuj xjel ti'j kyb'inchb'en; b'inchantza wi'je ik tza'nx ntene tz'aqlxix qine ex minti' wile.

⁹Aya Dios tz'aqlxix, in b'aj tke'yina qe ximb'etz ex aju in kyna'n xjal tuj kyanmi, q'manxa kye xjal mya b'a'n tu'n mi'n kyb'inchantl il, atzunte xjal b'a'n tmod kukx tenk tu'na wa'lxix.

¹⁰Aju kolol weye ate Dios aju ma'xix toklen, aju in che klet qe xjal b'a'n kymod tu'n.

¹¹Ate Dios jwes tz'aqlxix, tkyaqil maj at tq'oj kyi'j qe xjal mya b'a'n.

¹²Qatzun mi'n ma tz'ajtz ti'j tanmi xjal, kjawil tjaqu'n Dios ttzi t-spad; ma tz'el t-xqinin taq'al xob'l tplech,

¹³ma b'ant tten tu'n kyxi t-xo'n qe tplech in che k'ant tu'n q'aq', ex ma b'ant kyten qe tmakb'il in che ajb'en tuj q'oj, aqeju in che kyim xjal kyu'n.

¹⁴Kyke'yinxe aju xjal mya b'a'n; in kub' ten ximal ti'j tuj tanmi tu'n tb'inchante mya b'a'n, ex tujx tanmi in jatz jlet nik'aj yol.

¹⁵Ma b'aj tb'incha'n jun jul matij t-xe' ex tujx jul lu kxel tz'aq.

¹⁶Aju mya b'a'n in tb'incha'n xjal ex aju ttx'u'jil, tib'ajx che b'el tz'aq qe jlu.

¹⁷Kjawil nnimsa'ne Qman tu'nju tz'aqlxixte; che xel nb'itzane qe b'itz ti'j tb'i Qman aju ma'xix toklen.