Read kumam Salmos 71 Bible Online

Salmos 71 - kumam bible

Salmos 71

¹Nman, ti'ja ma tz'ok nklon wib'e; mi'n taq'a amb'il tu'n tkub' nch'ixwiye.

²Chin tonintza ex chin tkloma porke aya tz'aqlxix. Chin tb'intza ex chin tkloma.

³Tz'okwita te weye ik tza'n jun pik tu'n tok nklon wib'e ti'j; tz'okxwita te jun lugar kyuw tten te kolb'il wib'e ex kolol weye. Aya ik ttena te weye ik tza'n jun pik ex jun lugar kyuw tten.

⁴Nman Dios, chin tkloma tuj tq'ab' ju xjal mya b'a'n, tuj tq'ab' ju b'yol xjal ex tuj tq'ab' aju jawni twitz tu'n tq'ojin,

⁵porke ti'ja Nman Dios in chin ayone, ex ti'ja q'uql nk'u'je atxix tuj nku'xumale.

⁶Tej atinxtoqe tuj talb'il ntxu'ye otoq tz'ok qe' nk'u'je ti'ja. Tu'na in ul itz'je. Kukx kjawil nnimsa'ne.

⁷Ma che jaw lab'in nimku xjal wi'je, ex aya kolb'il weye.

⁸Tkyaqil q'ij in chin yoline ti'j tajwalila ex in jaw nnimsa'ne tb'iya;

⁹mi'n chin el tik'una ok ntijine; mi'n chin kyaj tkolina ok minti'tl wipune.

¹⁰Qe aj q'oj wi'je kyaj tu'n nkub' kyb'yo'n, ma tz'ok kyjunin kyib' ex in b'aj kyximan tu'n kyb'inchante mya b'a'n wi'je.

¹¹In kyma'n kyja': Che lpexe ti'j ex kytzyuntze, ma kyaj kolin tu'n Dios ex mi a'l jun jaku klonte te.

¹²Mi'n tz'el laq'e'ya wi'je Nman Dios; tzaj naja onil weye.

¹³Tzajxwit kych'ixwi ex che najxwit qe aj q'oj wi'je. Tzpet-xwit kynab'l ex tz'elxwit kych'ixwi qeju kyajb'il tu'n ttzaj mya b'a'n wi'je.

¹⁴Atzun weye kukx chin ayole ti'ja, ex kukx kjawil nnimsa'na;

¹⁵tkyaqil q'ij kxel nchik'b'a'ne aju ttena tz'aqlxix ex aju kolb'il tu'na. Ma'xixte jlu, mlay tz'el nnik'e ti'j.

¹⁶Chin okel tene q'malte qe b'inchb'en nim kyipumal o che b'ant tu'na Nman; kxel nma'ne qa o'kxku aya tz'aqlxix.

¹⁷Nman Dios, aya o tzaj xnaq'tzante weye atxix tuj nku'xumale, ex kukx in chin yoline kyi'j qe tb'inchb'ena ma'xix.

¹⁸Nman Dios, mi'n chin kyaj tkolina ok ntijine ex ok t-saqix nwi'ye, tu'ntzun nyoline ti'j ju tipumala ma'xix kye qe xjal ate' ja'lo ex kye qeju che ul itz'j te tib'ajxi.

¹⁹Nman Dios, aju ttena tz'aqlxix japun pon max twitz kya'j; tu'na o che b'ant qe ti'xti ma'xix kyxilen; mi a'l juntl ik tza'n teya.

²⁰Maske ma taq'a amb'il tu'n twile nimku mya b'a'n ex b'is, pero chin anq'ile tu'na juntl maj; chin kjawitz ti'na max t-xe'pun tx'otx',

²¹ktzajel tq'o'na mastl woklene ex ktzajel tq'uqb'a'na nk'u'je juntl maj.

²²Nman Dios, che xel nb'itzane qe b'itz ex kjawil nnimsa'ne tb'iya tuk'il tq'ajq'ajel twi chnab' arpa ex kitar, tu'nju in japun tu'na tkyaqilju in tzaj ttziyana, aya Xjan kye aj Israel.

²³Chin tzalajele ok kyxi nb'itzane qe b'itz teya, ax ikx ktzalajel wanmiye aju ma klet tu'na.

²⁴Ax ikx kxel nma'ne tkyaqil q'ij qa aya puro tz'aqlxix, porke ma kub' kych'ixwi qeju kyaj tu'n ttzaj mya b'a'n wi'je.