Read kumam Salmos 72 Bible Online

Salmos 72 - kumam bible

Salmos 72

¹B'itz ti'j rey Salomón Nman Dios, q'ontza tnab'l rey tu'n tkawin tuj tumelxix, ex tz'okwit te tz'aqlxix tu'na.

²Tuj tumelxix kkawil kyib'aj qe xjal etzan tu'na ex tuj tumelxix kxel tb'incha'n kyi'j qe xjal in che yajlanjtz.

³Tuj tumelxix kkawil ju rey kyib'aj xjal tu'ntzun kyten tuj txub'txaj qe xjal etzan tu'na.

⁴Tuj tumelxix kxel tb'incha'n rey kyi'j qe meb'a, ex che kletel tu'n qe xjal minti' at kye, ex b'i'x che najel tu'n qe xjal in che yajlan.

⁵Ok che nimal xjal teya te jumajx, akux atxku q'ij ex xjaw.

⁶Ik k'okel ju rey ik tza'n jb'al ex ik tza'n ttxa che'w in b'aj ta'lin ju tx'otx' ex ju lugar jatum in che wa'n alumaj.

⁷Che tel xjal tuj txub'txaj ex che b'etel tuj tumelxix tuj tq'ijlalil tkawb'il, okxi tnaj xjaw.

⁸Kb'el ti'j tkyaqil tu'n, ex ktzajel qe' tkawb'il ttzi' jun mar tu'n tpon b'aj ttzi' juntl mar, ex ktzajel qe' ttzi nima Éufrates tu'n tpon b'aj max ttxa'npun tx'otx'.

⁹Qe xjal najl tuj tzqij tx'otx' che b'el ẍmeje' twitz, ex qe aj q'oj ti'j k'okex kyq'on kyib' tjaq' tkawb'il.

¹⁰Tzul q'i'n oyaj te ex chojb'il kyu'n qe rey te tnam Tarsis, ex kyu'n qe rey najl ttzi mar, ax ikx kyu'n qe rey tuj tx'otx' Sabá ex tuj tx'otx' Seba.

¹¹Kykyaqil rey che b'el ẍmeje' twitz ex kykyaqil xjal kyuj qe nasyon che ajb'el te.

¹²Porke a kkolol kyi'j qe meb'a in che kub'san twitz ex kyi'j qeju in che yajlanjtz ex minti' jun onil kye.

¹³Ktzajel tz'e'y tk'u'j kyi'j qe xjal mans, ex che kletel qe xjal meb'a tu'n.

¹⁴Che kletel tu'n tuj kyq'ab' qeju in che yajlan kye ex tuj kyq'ab' qe b'yol xjal, ex ma' t-xilen kychwinqlal tuj twitz.

¹⁵K'elel tq'ij rey ex ktzajel q'o'n te aju q'an pwaq in tzaj tuj tx'otx' Sabá. Kukx che kub'sal xjal twitz Dios ti'j rey ex kukx kxel kyq'o'n xjal chjonte te.

¹⁶Kchmetel nim twitz triw tuj tx'otx' lu ex ktzajel ch'iy nimxix tuj tiwitz tx'otx'. Ik k'okel twitz ik tza'n qe tze' twi witz Líbano, ex che chmetel nim xjal tuj tnam ik tza'n k'ul in poq'chaj tuj kojb'il.

¹⁷Kukx kyjel ten tb'i rey te jumajx ex kukx che yolil xjal b'a'n ti'j akux atx q'ij twitz kya'j. Kykyaqil xjal kyuj qe nasyon twitz tx'otx' ok kyk'ma' ky'iwb'il noq tu'n. Kykyaqil xjal kyuj qe nasyon twitz tx'otx' ok kyma': At tzalajb'il te.

¹⁸Qq'onx chjonte te Qman Dios aju Kydios aj Israel, porke o'kx a b'inchalte qe b'inchb'en ma' kyxilen.

¹⁹Nimanxwit te jumajx aju tb'i ma' t-xilen, ex nojxwit tkyaqil twitz tx'otx' tu'n tajwalil. Ikxwitju.

²⁰Atzun in pon b'aj qe tna'j Dios David, aju tk'wa'l Isaí.