Read kumam Salmos 73 Bible Online

Salmos 73 - kumam bible

Salmos 73

¹B'itz tu'n Asaf B'a'nte Dios kyuk'il aj Israel, kyuk'il qeju saq tuj kyanmi.

²Ch'ixmi ẍin jaw tolje, ex ch'ixmi ẍex jilj qe nqane,

³porke ma tzaj tlo'ch nk'u'je tej ẍe ok nke'yine puro tuj txub'txaj ate' qeju in jaw kyniman kyib' ex qeju mya nimal Dios.

⁴Minti' in che k'ixb'isanjtz, b'a'n ta' kyximlal;

⁵minti' in tzaj yajb'il kyi'j, ex minti' in tzaj jun k'ixk'oj kyi'j, ik tza'n kye txqantl xjal.

⁶Aju kynimb'il kyib' tok kyu'n ik tza'n jun kyu', ex aju k'ixb'isab'l kyu'n kyi'j xjal tok kyu'n ik tza'n kyxb'alun;

⁷nim mya b'a'n in tzaj jlet tuj kyanmi ex nim kyximb'etz mya b'a'n.

⁸In che xmayin ex in che yolin mya b'a'n, in jaw kyniman kyib' ex in b'aj kyyolin ti'j tu'n kyk'ixb'iset xjal kyu'n;

⁹in che yolin mya b'a'n ti'j Dios at tuj kya'j, ex kyaj tu'n kymandarin kyi'j kykyaqil xjal twitz tx'otx'.

¹⁰Kyja'tzun in che ok lpe' xjal kyi'j ex jurat in xi kyniman xjal aju yol in tzaj kyma'n.

¹¹In kyma'n: ¿Baqa jaku tb'i Dios? ¿Baqa jaku tz'el tnik' Dios ti'j, aju Dios at tuj kya'j?

¹²Kyja'tzun kyten qeju b'inchal mya b'a'n. Minti' in kyk'ulb'a'n jun mya b'a'n ex kukx in chmet kyq'inumab'l.

¹³Noqx gan nno'k tilil wu'ne tu'n tten wanmiye saq ex minti' in tzaj ntzyu'ne jun ti'xti mya b'a'n.

¹⁴Tuj enter q'ij in chin k'ixb'isanjtze tu'na, ex tkyaqil prim in kub' tq'o'na ncastiwoye.

¹⁵Noqwit ma kub' nximane ik tza'n kye xjal lu, mawtlo che kub' nsb'u'ne qe tk'wa'la.

¹⁶Ok tilil wu'ne tu'n tel nnik'e ti'j jlu, ex kyuw ela te weye.

¹⁷Max el nnik'e ti'j alkye kb'ajel kyi'j tejxi wokxe tuj tja Dios.

¹⁸Ma che kub' tq'o'na tuj jun b'e puro jilin ex in che'x tlamo'na tu'n kynaj.

¹⁹Jurat naj in che naj tu'na, ex tu'nx kyxob'il in che kyim ex in che naj.

²⁰Ik kyten xjal lu ik tza'n jun witzik' ok tel qwatl, kyja'tzun Nman, ok tjaw we'ya, che elel tik'una ex mer ik tza'n noq jun tilb'ilal qe.

²¹Tzaj nim tlo'ch nk'u'je ex tzaj jun ta'w tuj wanmiye

²²tu'nju minti' nnab'le ex minti' el nnik'e ti'j; mer ik qine twitza ik tza'n jun txkup.

²³Maske ikju, pero kukx ma chin tene tuk'ila ex tzyu'n qine tu'n tb'anq'ab'a.

²⁴Ẍaqlu'n qine tu'na ex tzaj tq'o'na nnab'le, te b'ajsb'il ok chin k'metela tu'na tuj tajwalila.

²⁵¿Alkye ẍaqlul weye at tuj kya'j? O'kx aya. Ex ok ntene tuk'ila minti'tl waje ti'j ju at twitz tx'otx'.

²⁶In b'aj tipun nximlale ex wanmiye, ex a Dios q'olte tipumal wanmiye ex ate wetzb'ile te jumajx.

²⁷Qeju nne'l kypa'n kyib' ti'ja che kymel; ex qeju in kyaj kykolin kyokslab'l ti'ja, che najel tu'na.

²⁸Atzun weye chin xel laq'e'ye ttxlaj Dios, ex atzun mas b'a'n te weye. Nman Dios, aya kolol weye ex kxel nchik'b'a'ne tkyaqil tb'inchb'ena.