Read kumam Salmos 74 Bible Online

Salmos 74 - kumam bible

Salmos 74

¹B'itz tu'n Asaf Nman Dios, ¿tiqu'n ma qo kyaj tkolina te jumajx? ¿Tiqu'n ma tzaj ttx'u'jila qi'je aqo'ye t-ẍne'la ato'ye tuj tpe'na?

²Na'ntza qo'ye, aqo'ye jun tnam etzan tu'na, aju knet tu'na atxix ojtxi, aju o kolpet tu'na tu'n tok te jun tnam etzan tu'na; na'ntza aju witz Sión jatum o najana.

³Tzaja ke'yilte kye qe ja te jumajx ma che kub' xitj; ma b'aj kyxitun aj q'oj tkyaqil aju at tuj lugar xjan teya.

⁴Qe aj q'oj ti'ja in che sch'in tuj tjaya. Ma kub' kyq'o'n qe kybander te jun techal tu'nju ma che kamb'an.

⁵Mer ik tza'n tx'emil si' qe tuj tmijil jun chk'ul pin tze' tuj,

⁶tu'n siwb'il k'uxb'il ex tu'n martiy el kypa'n qe tilb'ilal k'ochimaj twitz ja.

⁷Ok kyqoptz'in q'aq' ti'j tjaya jatum najliya, ex b'aj kytz'ilsa'n ex kub' kyxitun.

⁸Kub' kyximan tu'n qkub' b'aje kyu'n; b'aj kypatun kykyaqil lugar jatum in kub' qchmon qib'e tu'n qk'ulune teya.

⁹Minti'tl in qile qe techal xjan qe, minti'tl jun t-sanjela atx ex minti'lpe b'a'n qu'ne jtoj b'aj jlu.

¹⁰Nman Dios, ¿jtoj tu'n t-xi kykolin aj q'oj tu'n kyyolin mya b'a'n qi'je? ¿Kukxpe che okel ten aj q'oj xmayil ti'ja?

¹¹¿Tiqu'n minti'tl in qo tzaj tonina? ¿Tiqu'n in che kub' ttz'ulina qe tq'ab'a?

¹²Atxix tuj tq'ijlalil ojtxi aya nreye. Nman Dios, nimku maj o qo klete tu'na;

¹³tu'n tipumala kub' tpa'n tib' mar, kub' tpa'na kywi' qe nintz txkup ate' tuj mar,

¹⁴kub' tpach'u'na qe twi' ju nintz txkup Leviatán tb'i, ex xi tq'o'na te kychi' qe txkup ate' tuj lugar minti' kynajb'il xjal tuj.

¹⁵Tu'na jaqet kywi a' ex qe nima, ex e aj tzqij qe nima aqeju b'ajx che aj tzqij.

¹⁶Teya ju q'ij ex qonik'an; tu'na o b'ant xjaw ex q'ij;

¹⁷tu'na kub' tq'o'na techal jatum ponin b'aj tx'otx'; tu'na b'ant tq'ijlalil koresma ex tq'ijlalil jb'alil.

¹⁸Q'o'nk tkwenta ti'j Nman, in ik'un aj q'oj ti'ja ex aju xjal minti' tnab'l in yolin mya b'a'n ti'ja.

¹⁹Mi'n tzik' qna'njtze tu'na. Minti' qipune. Ik qtene ik tza'n qe ẍpo'q; mi'n qo'x tq'o'na kye qe txkup te tjaq' k'ul.

²⁰Na'ntza aju yol o kyaj b'ant ti'j tu'na, ex nojni tuj tkyaqil twitz tx'otx' tu'n k'ixb'isab'l.

²¹Mi'n taq'a amb'il tu'n tkub' kych'ixwi qe xjal in che b'aj yajla'n; kjawil nimsa'na kyu'n qe xjal meb'a ex qe mans.

²²Nman Dios, we'ktza ex klom tib'a. Na'ntza, minti' in xi kykolin xjal minti' kynab'l tu'n tok ik'le'na kyu'n.

²³Mi'n tzik' tna'l tu'na aju tq'ajq'ajel kywi' aj q'oj ti'ja in che sch'in, tuk'ix tq'ajq'ajel nimxix kyu'n qeju in jaw kyi'n kyib' ti'ja.