Read kumam Salmos 75 Bible Online

Salmos 75 - kumam bible

Salmos 75

¹B'itz tu'n Asaf In xi qq'one chjonte teya Dios, in xi qq'one chjonte teya; in tzaj qna'ne tb'iya ex in xi qtx'olb'a'ne qe tb'inchb'ena ma'xix kyxilen.

²In tma'n Qman kyja': Ok tpon tq'ijlalil b'animaj wu'ne, kb'el nq'o'ne kysentens xjal tuj tumelxix.

³Maske tzaj lu'lun tx'otx' kyuk'ix kykyaqil qeju najl twitz, pero wu'ne kyuwsa'maj qe tq'uqb'il tu'n mi'n kyyukch.

⁴In xi nma'ne jlu kye qe xjal in jaw kyniman kyib' ex qe xjal mya b'a'n: Mi'n tz'ok kyq'on kyib'e te ma' kyoklene ex mi'n jaw kyniman kyib'e;

⁵mi'n b'aj kyyoline qa at kyipumale, ex mi'n che oke jawni che yoline.

⁶Porke aju tu'n tjaw nimsa'n jun xjal, myatzun a in tzaj tuj tjawitz q'ij ex mi tuj telex q'ij, mi tuj lugar minti' kynajb'il xjal,

⁷o'kx ate Dios jwes; at junjun nno'k tq'o'n te ch'in toklen ex atzun junjuntl nno'k tq'o'n te ma' toklen.

⁸Tzyu'n vas tu'n tq'ab' Qman, ex aju vas lu atzun in yolin ti'j tq'oj, tku'x vin tuj, aju vin smo'maj twitz. Oktzun t-xi tqo'n aju vin lu, kykyaqil xjal mya b'a'n kyb'inchb'en ate' twitz tx'otx' kxel kyk'a'n tkyaqil.

⁹Atzun weye kukx kxel nq'o'ne tqanil ti'j Tdios Jacob ex kxel nb'itzane qe b'itz te nimb'il te,

¹⁰porke tu'n, knajel kynimb'il kyib' qe xjal mya b'a'n, atzun te xjal tz'aqlxix kxel tq'o'n mastl tipumal.