Read kumam Salmos 77 Bible Online

Salmos 77 - kumam bible

Salmos 77

¹B'itz tu'n Asaf In jaw tq'ajq'ajel nwi'ye kyuwxix ti'j Dios tu'ntzun ntzaj b'i'ne tu'n.

²Tuj q'ij ok in tzaj b'is wi'je in chin kub'sane twitz Qman, ex qonik'an minti' in xi nkoline tu'n kyjaw nyek'une qe nq'ab'e twitz kya'j tu'n nna'ne Dios. Ex minti' jatum in tzaj q'uqb'a'n nk'u'je.

³Ok in tzaj nna'ne Dios, b'i'x in chin jaw oq'e; ok in chin kub' tene ximal ti'j, b'i'x in tzaj b'aj nk'u'je.

⁴Nman, tu'na minti' nno'kx watl tuj nwitze, nim in b'aj nk'u'je ex mlay b'ant nyoline.

⁵In tzaj nna'ne qe tq'ijlalil ex qe ab'q'i te ojtxi;

⁶in tzaj nna'ne tej in chin b'itzane qonik'an, in chin ximane tuj wanmiye ex in chin xjeline wujxi kyja':

⁷¿Kukxpelo ktel tq'oj Qman qi'j te jumajx? ¿Mlaypelo qo kub' t-xtalin juntl maj?

⁸¿Mapetzun b'aj aju tk'ujlalil? ¿Mapetzun b'aj te jumajx aju yol tzaj ttziyan?

⁹¿Mapetzun tzik' tna'l tu'n Dios aju t-xtalb'il? ¿Maske at tq'oj, mlaypelo tzaj q'aq'an tk'u'j qi'j?

¹⁰Aju mas in chin b'isune ti'j atzun jlu: Aju Dios ma' toklen mya ax tmod wuk'ile ik tza'n nej.

¹¹Che tzajel nna'ne qe b'inchb'en ma'xix kyxilen o tb'incha Qman ojtxi;

¹²chin ximale ti'j tkyaqilju o tb'inchaya, chin yolile kyi'j qe tb'inchb'ena.

¹³Nman Dios, xjan teya tuj tkyaqilju in tb'incha'na; ¿alkye juntl nno'k kydiosin xjal ma'xix toklen ik tza'n teya?

¹⁴Dios, aya in b'inchante qe b'inchb'en ma'xix kyxilen. Xi tyek'una tipumala kye qe nasyon.

¹⁵Tu'n tipumala o klet aju tnam etzan tu'na, aqeju tk'wa'l Jacob ex qe tk'wa'l José.

¹⁶Nman Dios, tej tke'yinjtza tu'n mar, tzaj t-xob'il twitza, ex e jaw lu'lun qe a' mas ma' kyxe' tuj mar;

¹⁷tzaj ttzoqpi'n muj nim jb'al, o tininin q'ankyoq twitz kya'j ex tuj tkyaqil pak' o qoptz'aje' xle'laj kya'j.

¹⁸O b'injtz tq'ajq'ajel q'ankyoq in tininin wen tuj xkyaqinpaẍ; tuj tkyaqil twitz tx'otx' o spik'b'anjtz tu'n xle'laj kya'j ex b'aj yukch tx'otx' tu'n kyaqnajnab'.

¹⁹Jaqet jun tb'eya tuj mar; ik'xa tuj nimku a', ex mi jun ok noj ti'j tik'len tqana.

²⁰Xi t-ẍaqlu'na qe xjal etzan tu'na ik tza'n txqan ẍne'l, ex tok Moisés tuk'ix Aarón te nejenel kye.