Read kumam Salmos 78 Bible Online

Salmos 78 - kumam bible

Salmos 78

¹B'itz tu'n Asaf Aqeye nxjalil, kyb'intze aju nxnaq'tzb'ile; q'ontzxix kywi'ye ti'j aju kxel nma'ne kyeye.

²Ok chin yolile tuj techal; kxel nchik'b'a'ne aju ewan atxix tuj tq'ijlalil ojtxi,

³aju o qb'i ex b'a'n qu'n ex o tzaj q'ma'n qe kyu'n qe qtzan qman.

⁴Mlay kub' qewan jlu kywitz qe qk'wa'l. Kxel qtx'olb'a'n kye qe qiyjil che ul itz'j te tib'ajxi qe tb'inchb'en Qman tb'anilxix, ex aju tipumal nimxix ex qe tb'inchb'en ma'xix kyxilen.

⁵Tzaj tq'o'n Dios jun ley tu'n tajb'en kye tiyjil, ex xi tq'o'n xnaq'tzb'il tu'n kyok lpe' aj Israel ti'j, ex xi tma'n kye qe qxe'chel tu'n t-xi kyxnaq'tza'n kye qe kyiyjil,

⁶tu'ntzun kyojtzqinte qe kyiyjil che ul itz'j te tib'ajxi, ex qe k'wa'l lu tu'n t-xi kyxnaq'tzan kye qe kyk'wa'l che ul itz'j te tib'ajxi,

⁷tu'ntzun tok qe' kyk'u'j ti'j Dios, ex tu'n mi'n tik' tna'l kyu'n aju tb'incha Dios; noq o'kx tu'n t-xi kyniman qe tmandamyent,

⁸ex tu'n mi'n kyok ik tza'n qe kyxe'chel mib'an che niman, ex kyuw kywi', mya q'uql kyk'u'j ti'j Dios, noq in jawje' kyk'u'j.

⁹Qe tiyjil Efraín b'anin kyten tuk'il xob'l plech e je'l oq tuj q'ij tej tok q'oj;

¹⁰minti' xi kyniman aju yol otoq b'ant ti'j kyu'n tuk'il Dios, ex minti'x xi kyniman qe t-xnaq'tzb'il.

¹¹Ik' tna'l kyu'n aju otoq tb'incha Dios, aqeju tb'inchb'en ma'xix kyxilen otoq tzaj tyek'un kye.

¹²Tb'incha Dios qe b'inchb'en ma'xix kyxilen kywitz qe kyman tuj lugar Zoán, aju at tuj Egipto:

¹³Kab'e ela mar tu'n, ex e ik'tz ti'n qe tuj, kub' ttzyu'n a' ex ik ok ik tza'n jun muro.

¹⁴Q'ijtl e je'x t-ẍaqlu'n qe tu'n jun muj, atzun te qonik'an tu'n t-spik'umal tqan q'aq'.

¹⁵Kub' tpa'n qe pik tuj tzqij tx'otx', ex xi tq'o'n nimxix kyk'a a'.

¹⁶Etz tilj nintz a' tuj pik tu'n Dios, ex ok ik tza'n jun nima matijxix.

¹⁷Atzun kye kukx e b'inchan il twitz Dios aju Ma'xix Toklen, ex jaw kyi'n kyib' ti'j tuj tzqij tx'otx'.

¹⁸Ok kyq'o'n Dios tuj malb'il, xi kyqanin kywa ik tza'nx kyajb'il.

¹⁹E yolin mya b'a'n ti'j ex in kyma'ntoq: ¿Jakupe tzaj tq'o'n Dios qwa tzalu tuj tzqij tx'otx'?

²⁰Ax tok o pax pik tu'n Dios ex o tz'etz tilj a' tuj ik tza'n jun nima, ex, ¿jakupetzun tzaj tq'o'n qwa? ¿Jakupetzun tzaj tq'o'n qchi', aqo' tnam etzan tu'n? Che chi, kyma.

²¹Tejtzun tb'inte Qman jlu, tzaj tq'oj kyi'j qe tiyjil Jacob, aqeju aj Israel kyb'i; jaw k'ant ttx'u'jil ik tza'n q'aq',

²²tu'nju minti' xi kyniman tyol Dios ex minti' ok qe' kyk'u'j ti'j ju kolb'il tu'n.

²³Maske ikju, pero xi tq'o'n Dios jun orden te muj ex e jaqet qe tlamel kya'j tu'n;

²⁴max tuj kya'j tzaj tchitun wab'j maná tb'i, xi tq'o'n te kywa, mer ik tza'n triw.

²⁵Qe xjal lu xi kywa'n kywa anjel. Tu'n Dios xi q'o'n nimxix kywa.

²⁶Tu'n tipumal Dios tzaj xupin kyq'iq' tuj tjawitz q'ij, ax ikx ju kyq'iq' tuj tnayaj q'ij,

²⁷tzaj t-sama'n Dios qe chyu'j te kychi' qe xjal etzan tu'n; aqeju chyu'j tzaj t-sama'n ik kyajlal ik tza'n ttxa tz'a'n ttzi mar.

²⁸E tzaj t-sama'n Dios jatum kykub'sa'n qe xjal ex kyi'jele qe ja xb'alun.

²⁹Ex e wa'n tejxi tnoj kyk'u'j, kyja'tzun xi tq'o'n Dios aju kyajb'il.

³⁰Ex na'nxtoq tnoj kyk'u'j ex atxtoq kychi' tuj kytzi',

³¹tej ttzaj ttx'u'jil Dios kyi'j, e kub' tb'yo'n qe xinaq mas nim kyipun. E kub' tb'yo'n qe xinaq mas tb'anil kyxol aj Israel.

³²Maske b'ant tkyaqil jlu, pero e ok ten b'inchal il juntl maj; minti' xi kyniman qe tb'inchb'en Dios ma'xix kyxilen.

³³Kyja'tzun kub' tq'o'n Dios kycastiw tu'n kykyim te jurat naj, ex tzaj tq'o'n nim xob'ajil kyib'aj.

³⁴Ok in che kyim txqan tu'n Dios, atzun qeju in che kyaj anq'in in che ok ten kub'sal twitz Dios; in che aj meltz'aj tuk'il tu'n tkyaqil kyk'u'j,

³⁵in pontzun Dios ti'j kyk'u'j, aju Dios Ma'xix Toklen, aju in kolin kyi'j ex in che klet tu'n.

³⁶Ex noq tu'n kytzi' in xi kyma'n nimku yol puro b'a'n tb'inx, ex puro nik'aj yol jlu,

³⁷minti'x e yolin axix tok, ex minti' japun kyu'n aju yol kyaj b'ant ti'j tu'n Dios kyuk'il.

³⁸Ex nimku maj tzaj q'aq'an tk'u'j Dios kyi'j, kub' tnajsa'n kyb'inchb'en mya b'a'n ex minti' e naj tu'n, nimku maj minti' tzaj tq'oj kyi'j, ex minti' xi tq'o'n amb'il tu'n ttzaj ttx'u'jil.

³⁹Tzaj tna'n Dios qa noq elaj xjal qe, ex ik kyten ik tza'n kyq'iq' in xi' ex ya minti'tl in ajtz meltz'aj.

⁴⁰Nimku maj minti' xi kyniman tyol Dios tuj tzqij tx'otx'; tu'n jlu tzaj tb'is Dios kyi'j.

⁴¹Ex kukx ok kyq'o'n Dios tuj malb'il; tzaj tb'is Dios kyu'n, aju Dios xjan kye aj Israel.

⁴²Minti' tzaj kyna'n aju tipumal Dios ex aju q'ij tej kyklet kywitz qe aj q'oj kyi'j.

⁴³Tej tb'inchante qe b'inchb'en ma'xix ex xob'ajilxix tuj lugar Zoán at tuj Egipto,

⁴⁴e ok qe nima te chik' tu'n, tu'ntzun mi'n kyk'an aj Egipto ti'j.

⁴⁵Tzaj t-sama'n qe xkatz ex ẍal kyi'j, tkyaqil b'aj naj kyu'n;

⁴⁶xi tq'o'n twitz kyawal kye qe ẍplon, aju twitz kyawal otoq che aq'nan ti'j.

⁴⁷Tu'n saqb'aqun ex tq'ab' che'w e b'aj naj qe tqan higo ex tqan uva kye aj Egipto.

⁴⁸E kyim qe kywakẍ ex qe kyẍne'l tu'n saqb'aqun ex tu'n tqan q'ankyoq.

⁴⁹Tzaj nimxix ttx'u'jil Dios kyi'j; tzajxix tq'oj ex tzaj t-sama'n yajb'il kyi'j. Tzaj t-sama'n jun k'loj anjel kyi'j tu'n kynaj.

⁵⁰Tzaj nimxix ttx'u'jil kyi'j, minti' xi tq'o'n amb'il tu'n kyanq'in, noq o'kx tzaj tq'o'n tx'u'j yab'il kyi'j tu'n kykyim;

⁵¹E kub' tb'yo'n kykyaqil qe nej kyk'wa'l xjal aj Egipto.

⁵²E je'tz ti'n qe aj Israel ik tza'n jun pe'n ẍne'l; e je'x tuk'in tuj tzqij tx'otx'.

⁵³Cheb'a e je'x tuk'in qe tu'ntzun mi'n kyxob', atzun qe aj q'oj kyi'j e kyaj mulq'aj tjaq' mar.

⁵⁴E tzaj ti'n Dios qe xjal etzan tu'n e pon ti'n tuj jun tx'otx' xjan, tuj tiwitz tx'otx' aju tu'nx el ti'n.

⁵⁵Kywitzx aj Israel e ex tlajo'n Dios qe nasyon najl tuj tx'otx' lu; tuj piẍin xi t-sipan tx'otx' kyxol kykyaqil k'loj aj Israel, ex atzun xi tq'o'n kye tu'n kynajan tuj.

⁵⁶Atzun kye ok kyq'o'n Dios tuj malb'il, aju Dios Ma'xix Toklen, jaw kyi'n kyib' ti'j ex minti' xi kyniman qe tmandamyent.

⁵⁷Ax o kyb'incha ik tza'nx o kyb'incha qe qtzan kyman, el kypa'n kyib' ti'j Dios ex minti' japun tyol kyu'n, e ok ik tza'n jun xob'l plech ẍo'k ti'j.

⁵⁸Tzaj tq'oj Dios kyu'n, tu'n tlaj jaw kyb'incha'n qe altar kywi witz; okx kyik'len tu'n tlaj e k'ulun kywitz qe tilb'ilal.

⁵⁹Tzaj tq'oj Dios kyi'j tej ttil jlu, ex b'i'x e jel tik'un qe aj Israel,

⁶⁰ex kyaj tkolin aju ja xb'alun te nab'l te at tuj Silo, aju tja at kyxol xjal.

⁶¹Xi tq'o'n amb'il kye aj q'oj tu'n t-xi kyi'n aju kax k'ub'l tley Dios, aju techal ti'j tajwalil ex ti'j tipumal.

⁶²Nimxix ttx'u'jil tzaj kyi'j qe xjal etzan tu'n, kyja'tzun e je'x tq'o'n tuj kyq'ab' aj q'oj kyi'j tu'n kykub' kyu'n.

⁶³Tu'n q'aq' e kyim qe ku'xun at kyxol. Tu'n jlu minti' e moje' qe q'apoj.

⁶⁴Tu'n spad e kyim qe pal, ex minti' xi q'o'n amb'il tu'n kyjaw oq' qe kyxu'jil kyi'j.

⁶⁵Atzunte Qman tzaj tna'n tib' ik tza'n jun xjal nne'l twatl, ex ik tza'n jun soldad otoq tz'el q'e'n tuj twi',

⁶⁶ex kub' kyi'j aj q'oj ti'j tu'n ex e je'l oq qe; tzaj kych'ixwi tu'n te jumajx.

⁶⁷El tik'un qe tk'wa'l José, ex minti' jaw t-sk'o'n aju tiyjil Efraín;

⁶⁸noq o'kx jaw t-sk'o'n aju tiyjil Judá ex tuk'ix aju witz Sión aju k'ujla'n tu'n.

⁶⁹Jaw tb'incha'n jun lugar xjan ma'xix twa'l ik tza'n qe witz, ex kub' tkyuwsa'n te jumajx ik tza'nx tten tx'otx'.

⁷⁰Jaw t-sk'o'n David tu'n tok te tmajen, aju tok te pastor ẍne'l nej;

⁷¹el ti'n tu'n mi'n tpastorintl kyi'j qe ẍne'l, tu'ntzun tok ten kwentil kye qe xjal etzan tu'n, tu'ntzun tok te pastor kye aj Israel.

⁷²Ex atzunte David e ok tkwentin qe xjal etzan tu'n Dios; e ok tkwentin ex e je'x tuk'in qe tuk'il nab'l ex tuk'il tanmi axix tok.