Read kumam Salmos 79 Bible Online

Salmos 79 - kumam bible

Salmos 79

¹B'itz tu'n Asaf Nman Dios, qe xjal mya okslal ti'ja ma che oktz tuj tx'otx' etzan tu'na. Ma b'aj kytz'ilsa'n tjaya xjan ex ma b'aj kyxitun aju tnam Jerusalén.

²Aju kyximlal qe tmajena ex kyximlal qeju o che niman teya, ma txi kyq'o'n tu'n tajb'en te kychi' k'utz ex qe jil te tjaq' k'ul.

³Ma b'aj chitj kychk'el mer ik tza'n a' tuj enter tnam Jerusalén, ex mi a'l b'a'n tku'x maqunte kye.

⁴Ma qo ok xmayine kyu'n qe qvesine; ex ma qo ok tze'ne kyu'n qeju ate' qi'jele.

⁵Nman Dios, ¿jtoj txi tkolina tu'n tq'ojina qi'je? ¿Kukxpe ktzajel tq'oja qi'je mer ik tza'n q'aq' in k'ant?

⁶E ttzaj ttx'u'jila kyi'j qe nasyon mya okslal qe ti'ja, aqeju minti' ojtzqi'na kyu'n ex minti' in tzaj na'n tb'iya kyu'n.

⁷Ex atzun qe jlu o che kub' b'yonte qe tiyjil Jacob ex ma b'aj kyxitun kytanmi.

⁸Mi'n kub' tq'o'na qcastiwoye tu'n tlaj mya b'a'n kyb'incha qe qxe'chele; q'aq'antz tk'u'ja qi'je porke ma b'aj qipune.

⁹Nman Dios, aya klol qeye, qo tonintza, qo tkloma ex najsama qile tu'ntzun tjaw nimsa'n tb'iya.

¹⁰¿Tza'n tten kxel kyma'n qe txqantl nasyon kyja':? ¿Jatumtzun ta' Kydios? Kuchiwt tz'ok qke'yine ok t-xelin tu'na aju kykamik qe tmajena, tu'ntzun ikx kye tu'n tel kynik' ti'j.

¹¹B'intza tq'ajq'ajel kywi' qe pres, aqeju tkub' kysentens tu'n kykyim, ex kloma qe tu'nju tipumala ma'xix.

¹²Nman Dios, q'on aja wuq maj t-xel kye qe txqantl nasyon kyvesin kyib' quk'ile, tu'n tlaj yol mya b'a'n o kyma ti'ja.

¹³Atzun qeye, aqo'ye etzan tu'na, ik qo'ye ik tza'n ẍne'l, ex kwentin qo'ye tu'na, kukx kxel qq'o'ne chjonte teya, che xel qb'itzane qe b'itz te nimb'il teya tuj tkyaqil tab'q'iyil.