Read kumam Salmos 8 Bible Online

Salmos 8 - kumam bible

Salmos 8

¹B'itz tu'n David Aya Qman Dios Tajaw Tkyaqil, ma'xix t-xilen tb'iya tuj tkyaqil twitz tx'otx', in pon qoptz'aj tajwalila max t-xe'pun kya'j.

²Tu'nju in jaw nimsa'n tb'iya kyu'n qe tal k'wa'l kyuk'ix qeju na'nx kyel ti'j kych'u', ma jaw tb'incha'na jun ja te kolb'il tu'n kylaj qe aj q'oj ti'ja, tu'ntzun kyb'aj naj qeju mib'an che niman ex qe aj q'oj.

³Ok in xi nke'yine aju twitz kya'j b'ant tu'na, aju xjaw ex qe che'w ate'k tu'na twitz,

⁴in kub' nximane: ¿Ti kyxilen qe xjal? ¿Tiqu'n kukx in che tzaj tna'na ex kwentin qe tu'na?

⁵O tb'inchaya qe xjal ch'ixmi pon kyoklen ik tza'n qe anjel, ex ok tq'o'na kyajwalil ex nimb'il kye ik tza'n jun rey.

⁶Xi tq'o'na kyoklen tib'aj tkyaqil taq'unb'ena, ex kyaj tq'o'na tkyaqil tjaq' kykawb'il.

⁷Kyaj tq'o'na qe ẍne'l tjaq' kykawb'il, kyuk'ix qe wakẍ ex qe txkup te tjaq' k'ul,

⁸kyuk'ix qe chyu'j in che lipan twitz kya'j, qe kyiẍ tuj mar ex kykyaqil qeju ate' tuj mar.

⁹Aya Qman Dios Tajaw Tkyaqil, ma'xix t-xilen tb'iya tuj tkyaqil twitz tx'otx'.