Read kumam Salmos 81 Bible Online

Salmos 81 - kumam bible

Salmos 81

¹B'itz tu'n Asaf Che b'itzane tuk'il tzalajb'il te Dios aju q'ol qipumal. Kynimsa'n jawe aju Tdios Jacob, che sch'ine tuk'il tzalajb'il.

²Che b'itzane tuk'il tq'ajq'ajel twi' tal tampor, tuk'ix chnab' ex kitar.

³Kyq'ajtzan oke chun ok ttzaj yek'un juntl ak'aj xjaw, ax ikx ok ttijin xjaw, atzun q'ij lu tu'n tkub' qik'sa'n aju nintz ninq'ij.

⁴Ex atzun mandamyent lu tzaj tq'o'n Tdios Jacob kye aj Israel;

⁵atzun jun yol kyaj b'ant ti'j tu'n Dios kyuk'il tiyjil José tej tpon q'ojlel kyi'j aj Egipto. O nb'iye jun tq'ajq'ajel wib'aj aju minti' ojtzqi'n wu'ne, chi kyja':

⁶Ma tz'el wi'ne iqtz twi t-semila, ma kleta wu'ne tuj aq'untl kyuwxix.

⁷Tuj yajb'il teya in txkete tu'na, ex kleta wu'ne; tzaj ntzaq'we'na max tuj muj in tininin wen; ok nq'o'ne tuj malb'il kytzi' qe a' tuj Meriba.

⁸Aqeye xjal etzan qeye wu'ne, kyb'intze aju yol kxel nma'ne kyeye; b'a'nwt nxi kynimane, aqeye aj Israel.

⁹Mi'n tzaj kyi'ne jun kydiose tuj junxitl tnam; mi'n che k'ulune kywitz kydios qe xjal aqeju minti' ojtzqi'n kyu'ne.

¹⁰Aqine Kymane aju Kydiose, aju etz q'inte kyeye tuj Egipto; kyqanintze kywaye weye ex ok che nojele wu'ne.

¹¹Atzun qe xjal etzan wu'ne minti' inx b'i'ne kyu'n; minti' inx nimane kyu'n aj Israel.

¹²Kyja'tzun e kyaj nq'o'ne kukx tu'n kyten mib'an che b'in, ex e anq'in ik tza'nx kyex kyajb'il.

¹³Noqwit inx b'i'ne kyu'n aj Israel aqeju etzan wu'ne, noqwit e b'et kyuj qe nb'eye,

¹⁴juratwitlo kub' kyi'j aj q'oj kyi'j wu'ne ex juratwitlo kub' nq'o'ne kycastiw.

¹⁵Qeju in che ik'un ti'j Qman, juratwitlo kub' kyi'j tu'n ex juratwitlo kub' kycastiw te jumajx.

¹⁶Mawtlo tz'ok tk'a'chan Dios qe xjal etzan tu'n tu'n tb'anil triw, ex mawtlo tz'el txqetle'n kyi'j tu'n ta'l kab' te tjaq' k'ul.