Read kumam Salmos 84 Bible Online

Salmos 84 - kumam bible

Salmos 84

¹Aju b'itz lu o tz'ib'anjtz tu'n tajb'en te kye tiyjil Coré Tb'anilxix tjaya Nman Dios aya Tajaw Tkyaqil.

²Nimxix nganiye tu'n ntene twitz tjaya. Tu'n tkyaqil wanmiye ex ntzalajb'ile in chin b'itzane teju Dios itz'.

³Qe tal chyu'j ex qe xtx'a'y in knet kylugar tu'n tok kyq'o'n kyq'u' ti'j t-altara tu'n kyjaw poq'l kyal, Nman, aya Tajaw Tkyaqil, aya Nreye ex aya Ndiose.

⁴At tzalajb'il kye qeju najl tuj tjaya ex kukx in jaw nimsa'n tb'iya kyu'n.

⁵At tzalajb'il kye qeju in knet kyipumal tuk'ila, ex at nim kygan tu'n kyxi' tuj tjaya.

⁶Ok in che ik' tuj tzqij tx'otx', in ch'expet kyu'n ex nno'k ik tza'n jatum in che jaw jlet qe twi a', ex ok in tzaj jb'al, nim a' in jaw chmet.

⁷Qeju xjal lu nno'kxi kyipumal junjun q'ij, ex k'okel kyke'yin ju Dios Ma'xix T-xilen tuj tnam Sión.

⁸Nman Dios, aya Tajaw Tkyaqil, aya Tdios Jacob, b'intza nna'j Diose.

⁹Nman Dios klol qeye, ke'yintza tuk'il tzalajb'il aju xjal sk'o'maj tu'na tu'n tok te rey.

¹⁰Mas b'a'n tu'n ntene jun q'ij tuj tjaya, twitzju tu'n ntene jun mil q'ij mya tuj tjaya; mas b'a'n tu'n ntene ttzi tja Ndiose, ex mya tu'n ntene jatum najl qeju b'inchal mya b'a'n.

¹¹Porke ate Qman Dios spik'un ex klol qe; tzul tq'o'n xtalb'il ex nimb'il qe, ex mlay kub' t-xk'ayin tu'n ttzaj tq'o'n aju b'a'n kye qeju in che b'et tuj tumelxix.

¹²Aya Qman Dios Tajaw Tkyaqil, at tzalajb'il kye qe xjal in qe' kyk'u'j ti'ja.