Read kumam Salmos 86 Bible Online

Salmos 86 - kumam bible

Salmos 86

¹Tna'j Dios David Nman Dios, chin tb'intza ex chin ttzaq'wentza porke b'isxix atine ex meb'a qine;

²chin tkloma porke in chin nimane teya. Aya Ndiose chin tkloma, aqine tmajena q'uql nk'u'je ti'ja.

³Nman, q'aq'antz tk'u'ja wi'je, tkyaqil or in jaw tq'ajq'ajel nwi'ye ti'ja.

⁴Nman, tzalajsama nk'u'je aqine tmajena, porke twitza in chin kub'sane.

⁵Porke b'a'na Nman ex in kub' tnajsa'na kyil xjal; nimxix tk'ujlalila kyi'j qeju in che kub'san kywitz teya.

⁶Nman, b'intza nna'j Diose, q'ontz twi'ya ti'j nkub'sb'ile twitza.

⁷Ok in tzaj yajb'il weye in xi nqanine onb'il teya, porke in chin tzaj ttzaq'we'na.

⁸Minti' juntl aju nno'k kydiosin xjal jaku pon ik tza'n teya Nman. Mlay pon kyaq'unb'en txqantl ik tza'n teya taq'unb'en.

⁹Nman Dios, tu'na o che b'ant kykyaqil nasyon, ok che tzajel k'ulul teya ex kjawil kynimsa'n tb'iya.

¹⁰Porke o'kxku aya Dios nim toklena, ex in che b'ant qe b'inchb'en nim kyipumal tu'na.

¹¹Nman Dios, yek'untza tb'eya weye tu'ntzun wok lpe'ye ti'j tyola axix tok, ex o'kx tu'n nnimane teya.

¹²Nman Dios, kjawil nnimsa'ne tu'n tkyaqil wanmiye ex kukx kjawil nnimsa'ne tb'iya.

¹³Ma'xix tk'ujlalila wi'je. Ma chin klete tu'na tu'n mi'n nxi tz'aqe tuj kynajb'il kyimni.

¹⁴Nman Dios, at jun k'loj xjal in jaw kyniman kyib' ex jawni kywitz tu'n kyq'ojin, minti' kyaj ti'ja, ma jaw kyi'n kyib' wi'je ex kyaj tu'n nkub' kyb'yo'n.

¹⁵Atzun teya Nman Dios, at tk'ujlalila ex at tq'aq'b'il tk'u'ja, at tpasensa, ma'xix ju tk'ujlalila ex axix tok tyola.

¹⁶Chin tke'yintza, q'aq'antz tk'u'ja wi'je. Chin tkloma aqine tmajena. Q'ontza wipune.

¹⁷Q'ontza jun yek'b'il ti'j t-xtalb'ila, tu'ntzun kyjaw ch'ixwi qeju in che ik'unte wi'je ok kyke'yinte jlu. Nman Dios, tu'na in tzaj tq'o'na onb'il weye ex q'uqb'ab'l nk'u'je.