Read kumam Salmos 88 Bible Online

Salmos 88 - kumam bible

Salmos 88

¹Aju b'itz lu o tz'ib'anjtz tu'n Hemán aju tiyjil Ezra, tu'n tajb'en te kye tiyjil Coré Nman, aya Ndiose ex Klol weye, q'ijl ex qonik'an in xi nqanine onb'il teya,

²ponwit nyole twitza, q'ontz twi'ya ti'j nkub'sb'ile.

³Nimxix mya b'a'n ma tzaj wi'je, kyja'tzun ch'ix nkyime;

⁴jaku chin ok kyq'o'n te tajlal kyxol qe kyimni, porke ma chin kyaj tene minti' wipune.

⁵Ma chin kyaj q'o'ne kyxol qe kyimni, ik ntene ik tza'n qe xjal otoq che kyim tuj q'oj ex otoq che ku'x maqu'n; ex ik tza'n qeju minti'tl kolb'il kye tuk'ila ex otoq tzik' kyna'njtz tu'na.

⁶Ma chin ku'x tq'o'na max t-xe'pun jul, kyuj qe lugar qlolj kyuj ex ma' kyxe'.

⁷Ma tzaj nim tq'oja wi'je, ma chin oke ik tza'n jun xjal in kyaj mulq'aj tjaq' a' tu'nju b'is in tzaj tq'o'na.

⁸Tu'na ma chin kyaj koline kyu'n qe wamiwoye; tu'na ma chin el ik'une kyu'n. Presin qine ex minti' tumel tu'n ntzoqpaje.

⁹Tu'n tlaj nim in chin oq'e nib'an woke moẍ. Tkyaqil q'ij in chin kub'sane twitza Nman, ex in che jaw nyek'une qe nq'ab'e twitz kya'j tu'n nyoline tuk'ila.

¹⁰¿Jakupe che b'ant qe b'inchb'en nim kyipumal tu'na kye qe kyimni? ¿Jakupe txi kyq'o'n qe kyimni chjonte teya?

¹¹¿Jakupe che yolin ti'j tyola axix tok ex ti'j tk'ujlalila tuj kynajb'il kyimni jatum in b'aj naj tkyaqil?

¹²Tuj kynajb'il kyimni puro qloljxix jatum nnik' tna'njtz tkyaqil, ¿atpe jun jaku tz'el tnik' ti'j ttena tz'aqlxix ex kyi'j qe tb'inchb'ena nim kyipumal?

¹³Atzun weye Nman, in chin qanine onb'il teya; prim in chin kub'sane twitza.

¹⁴¿Tiqu'n in chin el tik'una Nman? ¿Tiqu'n nne'l tewan tib'a nwitze?

¹⁵Atxix tuj nku'xumale in tene tuj b'is ex ch'ixmi in kyime; o tzik'x wu'ne qe ti'xti xob'ajilxix tzaj tq'o'na wi'je, ex mlay tzik'x mastl wu'ne.

¹⁶Ma tzaj ttx'u'jila xob'ajilxix wi'je ex ma chin naje tu'n,

¹⁷tkyaqil or txolin wi'je tu'n, mer ik tza'n tjaq' a' ma chin aj mulq'aje.

¹⁸O che el tlaq'b'a'na wi'je qe wamiwoye ex qe wuk'ile, atzun ja'lo o'kx qlolj at wuk'ile.