Read kumam Salmos 9 Bible Online

Salmos 9 - kumam bible

Salmos 9

¹B'itz tu'n David Aya Nman, kjawil nnimsa'ne tu'n tkyaqil wanmiye, ex kxel nma'ne kye kykyaqil xjal qe tb'inchb'ena in che b'ant ma'xix kyxilen.

²Aya Nman ma'xix toklena, chin jawil sch'ine tu'n tzalajb'il ti'ja; che xel nb'itzane qe b'itz ti'j tb'iya.

³Qe aj q'oj wi'je in che el oq twitza; in che kub' tz'aq ex in che kyim.

⁴Aya jwes tz'aqlxix ma kub' qe'ya tuj tq'uqb'ila tu'n ttzaj tb'incha'na wi'je.

⁵Ma che'x tkawina qe txqantl nasyon, ma che naj tu'na qe xjal b'inchal mya b'a'n. Ma naj kyb'i tu'na, tu'n mi'n kytzaj na'ntl.

⁶Ma che kyim qe aj q'oj, ex kyuk'ix qe kytanmi ma che naj junx kyuk'il; tu'na ma kub' t-xituna qe jlu, ex minti' jun ma kyaj ten tu'n ttzaj na'n ti'j.

⁷Kukx ktel Qman te rey te jumajx; ma tkyuwsa tq'uqb'il tu'n kyok qe xjal tuj xjel tu'n.

⁸Che okel qe nasyon tuj xjel tu'n tuj tumelxix, ex kb'el tq'o'n kysentens qe tnam tuj tumelxix.

⁹In kolin Qman kyi'j qeju in che b'aj yajla'n; in kolin kyi'j tuj tq'ijlalil yajb'il kye.

¹⁰Aya Nman, aqeju ojtzqi'na kyu'n, q'uql kyk'u'j ti'ja ex minti' in che kyaj tkolina qeju in che qanin onb'il teya.

¹¹Che b'itzane b'itz te nimb'il te Qman aju in kawin tuj tnam Sión; kyq'manxe kyuj qe tnam aju o tb'incha.

¹²Kukx in tzaj tna'n Dios qeju in che b'isun ex minti' nnik' tna'l kyoq'el tu'n; ex in kub' tq'o'n kycastiw qeju in che yajlan kye.

¹³Aya Nman, q'aq'antz tk'u'ja wi'je, ke'yintza, lu qine in chin yajlanjtze kyu'n qeju in che ik'un wi'je, chin tkloma te kamik,

¹⁴tu'ntzun t-xi nma'ne kye xjal ttzi tlamel tnam Jerusalén qa aya at toklena tu'n tjaw nimsa'na, ex in chin tzalaje ex tu'na ma chin klete.

¹⁵Qe txqantl nasyon tuj kyex kyk'ob'il in che kub' tz'aq; ex in kyaj q'e't kyqan tuj k'ob'il in kyaj kyq'o'n tuj ewaj.

¹⁶Ate Qman ma txi tyek'un tib' tej xkub' tq'o'n kysentens qe xjal mya b'a'n. Ma che kub' tz'aq qe xjal mya b'a'n tujx kyb'inchb'en.

¹⁷Qe xjal mya b'a'n, ex qeju mya okslal ti'j Dios, ex qeju nnik' tna'l Dios kyu'n, che pol b'aj tuj kynajb'il kyimni.

¹⁸Mya te jumajx k'ik'el kyna'njtz qe xjal meb'a, ex mya te jumajx mi'n japun aju onb'il in che ayon ti'j.

¹⁹We'ktza Nman, mi'n txi tq'o'na amb'il kye xjal tu'n tkub' ti'ja kyu'n, q'on kub'a kysentens qe txqantl nasyon.

²⁰Nman, tzajwit kyxob'il tu'na. Tz'elwit kynik' tnam xjal ti'j qa noq elajx jun xjal qe.