Read kumam Salmos 90 Bible Online

Salmos 90 - kumam bible

Salmos 90

¹Tna'j Dios Moisés aju tmajen Dios Nman Dios, ti'ja nno'k qklon qib'e tuj tkyaqil ab'q'i ojtxi ax ikx ja'lo.

²Tej na'nxtoq tb'inchet enter twitz tx'otx', atxix ojtxi ex tuj tkyaqil tab'q'iyil te jumajx, o'kx aya Dios.

³Kykyaqil xjal in che ok juntl maj te tquqil tx'otx' tu'na ok in tma'na kyja': Aqeye xjal, che oke te tquqil tx'otx'.

⁴Ax tok jun mil ab'q'i tuj twitza mer ik tza'n jun q'ij te ew aju o tz'ex, ex mer ik tza'n noq kab' ox or te qonik'an.

⁵In che naj xjal tu'na ik tza'n in che'x iqan tu'n a', ex ik kyten ik tza'n jun witzik', ex qa ik tza'n cha'x k'ul in tzaj poq'l te prim,

⁶te prim in tzaj t-xul ex in ch'iy, ex te qale in tzqij ex in naj.

⁷Ax tok in qo naje tu'n tq'oja, ex b'i'x in qo sek'paje tu'n.

⁸Qe qile ex qe qb'inchb'ene mya b'a'n in b'ant tuj ewaj, q'ancha'lxix qe twitza.

⁹Ax tok aju qq'ije kyja' tb'aj tu'n tlaj tq'oja, ex aju qab'q'iyile nne'x ik tza'n in tzaj xjiq'b'an qk'u'je.

¹⁰Aju qab'q'iyile tu'n qtene tzalu twitz tx'otx' noq 70 ab'q'i, ex qatzun at jun nimxix in ten, in japun twi' 80. Maske ma qo tene nim q'ij twitz tx'otx', pero noq b'is ex siktle'n nnik'x qu'ne. Jurat naj in che ex qe ab'q'i, ax ikx qeye jurat in qo ik'e twitz tx'otx'.

¹¹Mi a'l jun jaku tz'el tnik' ti'j ta'w tq'oja, ex mi jun jaku tz'el tnik' ti'j nik'pun ttx'u'jila at.

¹²Qo t-xnaq'tzantza tu'n tel qnik'e ti'j ax tok noq ch'in tuj qq'ije, tu'ntzun tten qnab'le.

¹³Nman Dios, tajtza juntl maj quk'ile, ex kuchiwt tzul naja. Q'aq'antz tk'u'ja qi'je aqo'ye tmajena.

¹⁴Qo tnojsama tu'n tk'ujlalila ok tkub' q'ij, ex qo b'itzale tu'n tzalajb'il tuj tkyaqil q'ij te qanq'ib'le.

¹⁵Q'ontza nim ab'q'i te tzalajb'il te t-xel ju k'ixb'isab'l qeye tu'na ex te t-xel ju b'is.

¹⁶Yek'untz tb'inchb'ena ma' t-xilen qeye aqo'ye tmajena, ex yek'untz tipumala tb'anilxix kye qe qk'wa'le.

¹⁷Qman Dios, b'inchama xtalb'il qeye, kuchiwt b'a'n tz'ela qaq'unb'ene tu'na, ax tok b'a'nwt tz'ela qaq'unb'ene tu'na.