Read kumam Salmos 94 Bible Online

Salmos 94 - kumam bible

Salmos 94

¹Yek'untz tib'a Nman, aya Dios in kub' tq'o'na kycastiw xjal.

²Aya jwes tib'aj tkyaqil twitz tx'otx'; we'ktza kyi'j qeju in jaw kyniman kyib' ex q'on kub'a kycastiw.

³¿Jtojtzun Nman, jtoj txi kykolin tu'n kytzalaj qe b'inchal mya b'a'n?

⁴Kykyaqil qe b'inchal mya b'a'n nim in che xmayin, in jaw kyniman kyib' ex in b'aj kyyolin kyib'.

⁵Nman Dios, kyu'ntzun qe jlu in che b'aj yajla'n qe xjal etzan tu'na.

⁶In kub' kyb'yo'n qe meb'a xu'j ex qe stranjer xjal ex kyuk'ix qe k'wa'l minti' kyman ex kytxu'.

⁷In kyma'n: Minti' in til Dios, aju Tdios Jacob minti' tok tkwent ti'j, che chi.

⁸Tz'exwit tuj kywi'ye, aqeye xjal mib'an tz'okx jun yol tuj kywi'ye ex minti' kynab'le. ¿Jtoj b'an tel kynik'e ti'j?

⁹¿Mlaypetzun tb'i aju b'inchante t-ẍkyin xjal? ¿Ex mlaypetzun til aju b'inchante tb'aq' twitz xjal?

¹⁰¿Mi'npetzun kub' kycastiw tu'n Dios, aju in xi mayonte kye qe nasyon? ¿Ex mlaypetzun tz'el tnik' Dios ti'j, aju in q'onte xnaq'tzb'il kye xjal ti'j ojtzqib'l?

¹¹B'a'n tu'n Qman, o'kx in che ximan xjal ti'j aju minti' tajb'en.

¹²Nman Dios, at tzalajb'il teju xjal aju in xi tkawina ex in xi tq'o'na xnaq'tzb'il te ti'j tleya,

¹³tu'ntzun tten tuj txub'txaj ok tpon tq'ijlalil mya b'a'n. Atzun kye xjal mya b'a'n kb'elex laku'n jul tu'n kyxi tz'aq tuj.

¹⁴Mlay kyaj tkolin Qman qe xjal etzan tu'n, ex mlay che kyaj tq'o'n kyjunalx.

¹⁵Tzul tq'ijlalil juntl maj kxel b'inchet kyi'j xjal tuj tumelxix, ex kykyaqil xjal tz'aqlxix b'a'n k'elel tuj kywitz.

¹⁶¿Alkye jun jaku tzul kolol wi'je kywitz qe xjal ploj kymod ex b'inchal mya b'a'n?

¹⁷Noqwit minti' onin Qman wi'je, luwtlo qine atine tuj kynajb'il kyimni.

¹⁸Tej t-xi nma'ne: In che'x jilj nqane, nchitzune, ula onil weye tuk'il tk'ujlalila, Nman.

¹⁹Ok in tzaj nximb'etze ex in b'aj nk'u'je, in tzaj tq'uqb'a'na nk'u'je ex in tzaj tq'o'na tzalajb'il.

²⁰Mlay moje' tyola kyuk'il qe jwes mya tz'aql, aqeju minti' in xi kyb'incha'n kyi'j xjal tuj tumel ik tza'n in tma'n ley,

²¹in che yolin ti'j kyxolx tu'n tkub' tcastiw xjal minti' til ex b'a'n tmod, ex in kub' kyq'o'n t-sentens tu'n tkyim.

²²Atzunte Qman kolol wi'je; ik tten Dios te weye ik tza'n jun pik nno'k nklon wib'e ti'j.

²³Ok che najel qe xjal mya b'a'n tu'n Qman; tu'nx kyb'inchb'en mya b'a'n che najel. Ok che najel tu'n Qman Dios.