Read kumam Salmos 95 Bible Online

Salmos 95 - kumam bible

Salmos 95

¹Kytzaje, qo b'itzan te Qman tu'n tzalajb'il; qo b'itzan te Dios aju ik tten ik tza'n jun pik in qo klet tu'n.

²Qo laq'ex twitz tuk'il aq'b'il chjonte, ex qo b'itzan b'itz te nimb'il te.

³Porke ate Qman Dios ma'xix toklen, ex a rey mas ma' toklen kywitz txqantl kydios xjal.

⁴Tuj tq'ab' ate' qe lugar tjaq'xi tx'otx', ex te qeju witz ma' kywa'l.

⁵Te Dios aju mar, porke tu'n o b'inchet; ex tu'n tq'ab' b'inchet aju tx'otx'.

⁶Kytzaje, qo ẍmejek tu'n qk'ulun te; qo ẍmejek twitz Qman, porke a b'inchante qe.

⁷Ate Qdios, atzun qe etzan qo' tu'n; ik qo' ik tza'n t-ẍne'l, ex kwentin qo' tu'n.

⁸Kyb'inxe ja'lo aju in tma'n kyeye: Mi'n kub' kykyuwsa'ne kyanmiye ik tza'n o kyb'incha qe kyxe'chele tuj lugar Meriba, ex qa ik tza'n o kyb'incha tuj lugar Masah tuj tzqij tx'otx',

⁹tej woke tuj joyb'il wi'je kyu'n ex tej nprobarinjtze kyu'n, maske otoq kyil qe nb'inchb'ene.

¹⁰O tzaj nq'oje kyi'j qe kyxe'chele 40 ab'q'i ex o nmaye: Qe xjal lu kukx in txalpuje' kyanmi, ex mi kyaj tu'n t-xi kyniman nyole.

¹¹Kyja'tzun o tzaj nq'oje kyi'j ex xi nma'ne jun nyole axix tok kye, tu'n mi'n kyokx tuj tx'otx' jatum tu'n kyojlan wu'ne, chi Dios.