Read kumam Salmos 96 Bible Online

Salmos 96 - kumam bible

Salmos 96

¹Kyb'itzanxe jun ak'aj b'itz te Qman; che b'itzane te Qman kykyaqile najlqeye twitz tx'otx';

²che b'itzane ex kynimsa'n jawe tb'i; tkyaqil q'ij kyq'onxe tqanil kolb'il tu'n.

³Che yoline ti'j tajwalil ex ti'j tb'inchb'en ma' t-xilen kye kykyaqil xjal ex kye kykyaqil nasyon,

⁴porke ma' t-xilen Qman ex b'a'n tu'n tjaw nimset tb'i; mas tu'n qxob' twitz kywitz qe txqantl kydios xjal.

⁵Qe kydios txqantl tnam minti' kyajb'en, atzunte Qman o b'ant kya'j tu'n.

⁶Txolin ti'j tu'n tajwalil ex tu'n t-spik'umal. At nim tipumal tuj tja ex puro tb'anil.

⁷Kykyaqile aqeye xjal najl twitz tx'otx' kynimsa'n jawe tb'i Qman, kynimsa'n jawe tb'i tu'nju at tipumal ex tajwalil.

⁸Kyq'onxe nimb'il te Qman tu'nju ma' t-xilen, kyi'ntze oyaj ex kyokxe tuj tja.

⁹Che k'ulune twitz Qman tu'nju tb'anilxix ex xjante. Kykyaqile aqeye xjal najl twitz tx'otx' che lu'lune tu'n kyxob'ile twitz.

¹⁰Kymanxe kye txqantl nasyon kyja': Ate Qman in kawin. Tu'n kub' tq'o'n t-simyentil tx'otx' tu'n mi tyukch; parej in kawin Dios kyib'aj kykyaqil tnam.

¹¹E ttzalaj kya'j tuk'ix tx'otx'; e tjulin mar tuk'ix tkyaqilju at tuj.

¹²B'a'n tu'n kytzalaj qe kojb'il tuk'ix tkyaqilju at kywitz, ex e kyjaw sch'in qe tze' tuj k'ul tu'n tzalajb'il

¹³twitz Qman aju tzul. Ax tok, tzul tu'n tkawin twitz tx'otx'; aju tkawb'il kyib'aj qe tnam twitz tx'otx' tz'aqlxix te ex axix tok.