Read kumam Salmos 97 Bible Online

Salmos 97 - kumam bible

Salmos 97

¹Tzalajxa aya tx'otx'. Che tzalajxe aqeye tx'otx' kyokx tuj tmijil mar nimxix kyb'aje. Ate Qman reyte.

²Txolin ti'jele tu'n q'eq muj; in kawin tuj tumel ex tz'aqlxix tkyaqilju in b'ant tu'n;

³nejni q'aq' twitz ex tu'n in che tz'e'y qe aj q'oj ti'j, aqeju txolin kyten ti'jele.

⁴Aju xle'laj kya'j in tzaj t-sama'n in t-spik'b'a'n twitz tx'otx', ex in jaw lu'lun tx'otx' ok tke'yinte jlu.

⁵Twitz Qman aju tajwil tkyaqil twitz tx'otx' in che kub' ulj qe witz ik tza'n xkab'.

⁶Aju kya'j nno'k ten yolil ti'j, tz'aqlxix te Dios; kykyaqil tnam in kyil aju tajwalil.

⁷E ttzaj kych'ixwi qeju in che k'ulun kywitz qe tilb'ilal, aqeju in che tzalaj kyi'j. Kykyaqil qeju nno'k kydiosin xjal ok che b'el mok'e' twitz Qman.

⁸Nman Dios, aju tnam Jerusalén kyuk'ix qe tnam ate' tuj tx'otx' Judá in che tzalaj tu'nju in kawina tuj tumelxix;

⁹porke ma'xix toklena Nman, tkub'sa'na tib'aj tkyaqil twitz tx'otx', ex ma'xix toklena kywitz kykyaqil qeju nno'k kydiosin xjal.

¹⁰Aqeye at kyk'ujlalile ti'j Qman, kyik'un ele aju mya b'a'n. Tu'n Qman in che klet qeju in che niman te; in che klet tu'n tu'n mi'n kykub' tz'aq tuj kyq'ab' qe xjal mya b'a'n.

¹¹In qoptz'aj spik'un kywitz qeju tz'aqlxix; at tzalajb'il kye xjal b'a'n kymod.

¹²Che tzalajxe ti'j Qman aqeye xjal tz'aqlxix, ex kynimsa'n jawe aju tb'i xjan.