Read kumam Salmos 98 Bible Online

Salmos 98 - kumam bible

Salmos 98

¹Jun b'itz Kyb'itzanxe jun b'itz ak'aj te Qman porke o tb'incha qe b'inchb'en ma'xix kyxilen. O kamb'an ti'j tkyaqil tu'nju tipumal ma'xix ex tu'n tq'ab' xjan.

²O tzaj tma'n Qman tqanil aju tkamb'ab'l, o tzaj tyek'un aju tten tz'aqlxix kywitzku qe nasyon;

³ma tzaj tna'n tk'ujlalil kyi'j aj Israel, ex kukx tjapun tu'n aju o txi ttziyan kye. Tuj tkyaqil twitz tx'otx' o ilwaj aju kamb'ab'l tu'n Qman Dios.

⁴Che b'itzane te Dios tuk'il tzalajb'il aqeye najl tuj tkyaqil twitz tx'otx'; che tzalajxe nim ex che b'itzane qe b'itz.

⁵Che b'itzane qe b'itz te Qman tuk'il tq'ajq'ajel twi chnab' arpa, ex tuk'il tq'ajq'ajel kywi kitar.

⁶Che b'itzane tuk'il tzalajb'il twitz Qman aju rey; che b'itzane tuk'il tq'ajq'ajel kywi' chun.

⁷E tjululun mar tuk'ix tkyaqilju at tuj, tuk'ix tx'otx' ex kykyaqil qeju najl twitz;

⁸e kyjaw tzalaj qe nima; e kysch'in qe witz junx tuk'il tzalajb'il,

⁹twitz Qman aju tzul kawil twitz tx'otx'. Parej kkawil kyib'aj qe tnam ate' twitz tx'otx', ex tuj tumelxix.