Read kumam Proverbios 1 Bible Online

Proverbios 1 - kumam bible

Proverbios 1

¹Qe yol o q'manjtz tu'n Salomón aju tky'ajal David ex rey kye aj Israel,

²atzun kyxilen jlu: Tu'n t-xi q'ot kynab'l xjal, tu'n t-xi q'ot xnaq'tzb'il kye ex tu'n tajb'en te onb'il kye tu'n tel kynik' kyi'j qe yol nim kynab'l;

³tu'n tknet jun xnaq'tzb'il kyu'n, tu'n tel kynik' ti'j jun ti'xti qa b'a'n ta', tu'n tten kynab'l tu'n kyb'inchante aju tz'aqlxix, tu'n kyb'et tuj tumelxix ex tu'n kyten cabal;

⁴tu'n tok kynab'l qe ku'xun ch'in kynab'l, ex tu'n t-xi q'ot kynab'l tu'ntzun kyel twitz jun ti'xti tu'n tb'inchet kyu'n, ex tu'n kyximan ti'j alkye b'a'n tu'n tb'ant kyu'n.

⁵Aju xjal at tnab'l ex list in kub' tq'o'n twi' kyi'j qe yol b'a'n, tu'ntzun jlu nno'k mastl tnab'l ex tojtzqib'l

⁶tu'n tel tnik' ti'j ju in kyma'n qe xjal aj nab'l, ti'j kyyol ex kyi'j qe techal in kyb'incha'n, ex tu'n tel kynik' kyi'j qe yol in che na'n aj nab'l kyi'j.

⁷Aju tumel tu'n tten tojtzqib'l xjal, atzun tu'n t-xob' twitz Qman ex tu'n tniman te, ex qe xjal mib'an che b'in nne'l kyik'un aju ojtzqib'l ex xnaq'tzb'il.

⁸Nk'wa'l, q'onx twi'ya ti'j xnaq'tzb'il in tq'o'n tmana, ex mi'n tzik' tna'l tu'na aju xnaq'tzb'il in tq'o'n ttxu'ya,

⁹porke a jlu k'okel te teya ik tza'n jun tb'anil adorn ex ik tza'n jun uwj, ex qa ik tza'n jun coron tjax tuj twi'ya.

¹⁰Nk'wa'l, qa kyaj qe xjal aj il tu'n tkub' sb'u'na kyu'n, mi'n txi tq'o'na amb'il kye.

¹¹B'alo ok kyma' teya: Qo' quk'ile, qo xq'uqil ti'j jun xjal minti' til tu'n tkub' qu'n ok tik' tuj b'e;

¹²qe xjal b'a'n kymod b'i'x che najel qu'n te jumajx, ik tza'n in che naj xjal tu'n kamik; enter qe in che ku'pun tuj kynajb'il kyimni.

¹³Knetel tkyaqil txkaj q'inumab'l qu'n ex kb'ajel noj tuj qja tu'n tkyaqilju k'elel qelq'a'n.

¹⁴Tzaja quk'ile, qo ten junx, ex junx e tajb'en qpwaq, che chilo teya.

¹⁵Nk'wa'l, mi'n txi'ya kyuk'il qe xjal lu, pa'n el tib'a ti'j b'e mya b'a'n q'i'n kyu'n,

¹⁶porke tok tilil kyu'n tu'n kyb'inchante mya b'a'n, ex tok tilil tu'n kykub' qe xjal kyu'n.

¹⁷Noq gan in kub' q'ot k'ob'il qa in che ke'yin chyu'j ti'j.

¹⁸Qe xjal lu kyi'jx in kub' kyq'o'n tramp ex in xi kyq'on kyib' tuj xob'ajil.

¹⁹Tu'nxju in pon kyk'u'j ti'j in che naj; atzun b'ajsb'il kye xjal jlu, aqeju in pon kyk'u'j ti'j tu'n kyelq'a'n.

²⁰Kyuj qe cay ex kyuj plas in b'injtz tq'ajq'ajel twi' ju q'ol nab'l,

²¹in xi tma'n tyol ttzi tlamel tnam ex kyuj qe lugar jatum in che chmet xjal, chi in tma'n:

²²Aqeye ku'xun minti' kynab'le, b'a'n che xmayine ex mib'an che b'ine: ¿Jtoj b'an tkyaj kykoline tu'n kytene minti' kynab'le? ¿Jtoj b'an tkyaj kykoline aju tzalajb'il tuj kywitze tu'n kyxmayine kyi'j kyuk'ile? ¿Maj kukx k'elel kyik'une aju ojtzqib'l?

²³Kyq'ontz kywi'ye ti'j ju in che ok nmayo'ne ti'j ex jaku txi nq'o'ne kynab'le; kxel nma'ne kyeye alkye nximb'etze.

²⁴O che tzaj ntxko'ne tu'n kytzaje wuk'ile, ex minti' ma chinx kynimane.

²⁵Noqpe ma tz'el kyik'une nconseje ex minti' kyaje tu'n kyok nmayo'ne.

²⁶Kyja'tzun kpol tq'ijlalil tu'n wok tene tze'l kyi'je ok ttzaj mya b'a'n kyib'aje; ok chin xmayile kyi'je ok ttzaj nim xob'ajil kyi'je,

²⁷ex ok ttzaj xob'ajil kyib'aje tuk'ix yajb'il ex b'is, a jlu mer ik tza'n jun xkyaqinpaẍ in b'aj naj tkyaqil tu'n.

²⁸Atzun q'ij lu ok che txokele wi'je, ex mlay che tzaj ntzaq'we'ne; ok che jyole wi'je, ex mlay chin knete kyu'ne;

²⁹porke nne'l kyik'une aju ojtzqib'l ex mi'n kyaje tu'n kynimane Qman.

³⁰Minti' kyaje tu'n t-xi kyb'i'ne nconseje ex minti' in kub' tuj kywitze tu'n kyok nmayo'ne.

³¹K'ik'ex nim kyu'ne tu'n tlaj kymodiye mya b'a'n. B'i'x kjawitz b'aj kyganiye ti'j kyximb'etze mya b'a'n.

³²Qeju minti' kynab'l in che naj tu'nju atx taj kynab'l, ex qeju mib'an che niman in che naj tu'nju minti' kyaj ti'j tu'n kyb'inchante jun ti'xti;

³³atzunju xjal ma tzaj tq'o'n twi' ti'j nyole, ok k'anq'il tuj tzalajb'il ex mlayx tzaj t-xob'il twitz noq alkye tzul ti'j.