Read kumam Proverbios 10 Bible Online

Proverbios 10 - kumam bible

Proverbios 10

¹Atzun qe tyol Salomón jlu: Aju k'wa'lb'aj at tnab'l, jun tzalajb'il jlu te tman; atzunju k'wa'lb'aj minti' tnab'l, jun b'is jlu te ttxu'.

²Aju q'inumab'l mya tuj tumel in knet, mlayx tz'ajb'en te xjal, atzunju xjal in b'et tuj tumelxix, in klet twitz kamik.

³Aju xjal tz'aqlxix, mlay kyaj tkolin Qman tu'n mi'n twa'n, atzunju xjal b'inchal mya b'a'n, nno'k tmayo'n Qman ti'j ju in pon tk'u'j ti'j.

⁴Aju xjal tk'i' tz'aq'nan, tal meb'a xjal k'okel; atzunju in aq'nanxix wen, ktel tq'inumab'l.

⁵Aju xjal at tnab'l, in jaw tchmo'n tawal ok tul tq'ij, ex aju noq in tan ok tul tq'ij twitz tawal, ktzajel tch'ixwi.

⁶Aju xjal tz'aqlxix, ky'iwla'n tu'n Qman Dios, atzunju xjal b'inchal mya b'a'n, txolin ti'j tu'n mya b'a'n.

⁷Aju xjal tz'aqlxix, kukx ktzajel na'n tb'inchb'en b'a'n; atzunju b'inchal mya b'a'n, jurat k'ik'el tna'l kyu'n xjal.

⁸Aju xjal at tnab'l, in xi tniman aju xnaq'tzb'il in tzaj q'o'n te, ex aju in yolin ti'j yol minti' tnab'l, knajel.

⁹Segurxix ta' aju in b'et tuj tumelxix; atzunju xjal nne'l txalpuj ti'j b'e b'a'n, che elel qe tb'inchb'en mya b'a'n tuj q'ancha'l.

¹⁰Aju xjal in kub' t-xmutz'i'n jun tb'aq' twitz tu'n tyek'unte qa mya ax tok aju in tma'n, in tzaj ti'n mya b'a'n tib'aj; ex aju xjal in yolin ti'j yol minti' ttxolil, kb'el tcastiw.

¹¹Qe tyol ju xjal tz'aqlxix in kyq'o'n chwinqlal, atzunju xjal b'inchal mya b'a'n, txolin ti'j tu'n mya b'a'n.

¹²Aju xjal nne'l tik'un tuk'il, noq q'oj in tzaj ti'n, atzunju xjal at tk'ujlalil, in kub' tnajsa'n tkyaqil mya b'a'n in b'ant kyu'n xjal.

¹³Aju tyol xjal at tnab'l, ojtzqib'l in tq'o'n, atzun teju minti' tnab'l, kxel jato'n jun tze' ttzal ti'j.

¹⁴Qe xjal at kynab'l in xi kyk'u'n kyojtzqib'l, atzunju kyyol qe xjal minti' kynab'l in tzaj xitb'il tu'n.

¹⁵Aju tq'inumab'l ju xjal q'inun, atzun kolil ti'j, atzunju xjal meb'a, ax tmeb'yil in tzaj q'inte mya b'a'n ti'j.

¹⁶Aju tkamb'ab'l jun xjal tz'aqlxix, atzun chwinqlal, atzunju xjal mya b'a'n, il in tkamb'a'n.

¹⁷Aju xjal in tb'i'n xnaq'tzb'il, in b'et tuj b'e te chwinqlal; atzunju xjal minti' in xi tb'i'n, kyja' in xi' tuj b'e in pon tuj najen.

¹⁸Aju xjal in q'ojl ti'j tuk'il ex in kub' tewan, nik'al yol te; ex aju xjal si'mil yol minti' tnab'l.

¹⁹Aju xjal in yolin ti'j nim yol, jaku tzpet ti'j; atzunju xjal in jak'unte ttzi' at tnab'l.

²⁰Aju tyol xjal tz'aqlxix ik tten ik tza'n saq pwaq tb'anilxix; atzunju t-ximb'etz xjal b'inchal mya b'a'n minti'x tajb'en.

²¹Qe tyol xjal tz'aqlxix in ajb'en te jun xnaq'tzb'il kye nimku, atzunte xjal minti' tnab'l, in naj tu'nju minti' tojtzqib'l.

²²Aju ky'iwb'il tu'n Qman, atzun in q'onte q'inumab'l ex minti' in tzaj ti'n jun b'is junx tuk'il.

²³Aju xjal minti' tnab'l in tzalaj ti'j ok tb'inchante mya b'a'n; atzunte xjal at tnab'l in tzalaj ti'j ju tnab'l at.

²⁴Aju mas in xob' xjal b'inchal mya b'a'n ti'j, axtzunju in tzaj ti'j, atzunte xjal tz'aqlxix in tk'mo'n aju tajb'il.

²⁵Ik tza'n xkyaqinpaẍ in tzaj ex jurat nnik' naj, iktzun in kub' naj aju b'inchal mya b'a'n, atzunju xjal tz'aqlxix kyjel ten te jumajx.

²⁶Ik tza'n vinagr nno'kx t-xe qe' b'ix in tzaj chyo'n tu'n, ex ik tza'n in xi' sib' tuj qwitz, iktzun nne'la ju xjal ky'aj teju samalte te.

²⁷Aju xjal in niman te Qman kxel laq'e' tuj tq'ij, atzun kye qe b'inchal mya b'a'n, k'okel laq'e' tuj kyq'ij.

²⁸Aju in ayon ju xjal tz'aqlxix ti'j, atzun tzul q'onte tzalajb'il te, ex aju in ayon ju b'inchal mya b'a'n ti'j, mlay tk'am.

²⁹In kolin Qman kyi'j qeju in kyb'incha'n b'a'n, ex qeju b'inchal mya b'a'n in che naj tu'n.

³⁰Aju xjal tz'aqlxix mlay tzik' yukun tuj tlugar, atzunju xjal b'inchal mya b'a'n, mlayx ten twitz tx'otx'.

³¹Aju xjal tz'aqlxix in yolin ti'j yol at tnab'l. Atzunju xjal jumajx tq'on tib' tuj mya b'a'n, b'i'x kmayetel tu'n tyolin.

³²Aju xjal tz'aqlxix in yolin ti'j yol txub'txaj tb'inx; atzunte xjal b'inchal mya b'a'n o'kx in yolin ti'j yol mya tuj tumel.