Read kumam Proverbios 11 Bible Online

Proverbios 11 - kumam bible

Proverbios 11

¹Ik'un tu'n Qman aju balans mya cabal, ex in tzalaj ti'j ju mark cabalxix.

²Aju xjal in jaw tniman tib' kb'el tch'ixwi; ex kyuk'il qe xjal mans, atzun ta' nab'l.

³Qe xjal in che anq'in tuj tumel in che ẍaqlunjtz tu'n kyb'inchb'en tz'aqlxix; atzun qe xjal sb'ul, tu'nxju kysb'ub'l in che naj.

⁴Tuj tq'ijlalil jwisi mlay che klet xjal tu'n kyq'inumab'l, atzunte xjal tz'aqlxix ok kletel tu'n mi'n tkyim.

⁵Aju xjal in b'et tuj tumelxix in xi jiquma'n ti'j tb'e tu'nju tz'aqlxix, atzunte xjal b'inchal mya b'a'n, ax in kub' tz'aq tuj tb'inchb'en mya b'a'n.

⁶Aju xjal tz'aqlxix in klet tu'nju minti' til, atzun qe xjal b'inchal mya b'a'n in che tzyet tu'nju in pon kyk'u'j ti'j nimku.

⁷Ok tkyim xjal mya b'a'n, ax ikx knajel aju in ayontoq ti'j, tuk'ix aju tok tk'u'j ti'j.

⁸Aju xjal tz'aqlxix in klet tuj yajb'il te, ex aju b'inchal mya b'a'n in yajlanjtz te t-xel.

⁹Aju xjal b'inchal mya b'a'n in che naj qe tuk'il tu'n tyol, atzunju xjal tz'aqlxix in klet tu'n tojtzqib'l.

¹⁰Qa b'a'n ta' ju xjal tz'aqlxix kykyaqil xjal tuj tnam in che tzalaj; ex ok kykyim qeju b'inchal mya b'a'n che jawil tzalaj xjal.

¹¹Tu'nju ky'iwb'il in kyk'mo'n qe xjal tz'aqlxix in ch'iy tnam, ex in kub' xitj tu'n kyyol qe b'inchal mya b'a'n.

¹²Aju xjal minti' tnab'l in yolin mya b'a'n ti'j tuk'il; atzunte xjal at tnab'l minti' in q'ajt.

¹³Aju xjal ẍtaq'il yol, tkyaqil in b'aj tyolin; atzunte xjal b'a'n t-ximb'etz, minti' in b'aj tyolin aju b'a'n tu'n.

¹⁴Qa mya tuj tumel in che kawin qe kawil tuj tnam, kb'el xitj tnam; ex qa at nimku xjal at kynab'l, jaku klet tnam.

¹⁵Mya b'a'n nne'la te xjal in kyaj we' ti'j tk'as juntl xjal minti' ojtzqi'n tu'n; atzunju xjal minti' in kyaj we' ti'j tk'as juntl, in anq'in tuj txub'txaj.

¹⁶Aju xu'j b'a'n tmod in tk'mo'n nimb'il te, aju xinaq at tipun tu'n taq'nan in knet q'inumab'l tu'n.

¹⁷Aju xjal b'a'n q'aq'an tk'u'j ti'j juntl in tzaj ti'n b'a'n tib'ajx, atzunju xjal in tzalaj tu'n tyajlanjtz juntl tu'n, tib'ajx in tzaj ti'n mya b'a'n.

¹⁸Jurat kb'el naj aju kamb'ab'l in tk'mo'n xjal b'inchal mya b'a'n; atzunte xjal in tb'incha'n aju tz'aqlxix ok tkamb'a' twi tk'u'j mlay b'aj.

¹⁹Aju xjal in tb'incha'n aju tz'aqlxix, tzul q'o'n tchwinqlal, atzunte xjal in tb'incha'n mya b'a'n, kpol tuj kamik.

²⁰Ik'un tu'n Qman qe xjal in che ximan ti'j tu'n kyb'inchante mya b'a'n, ex in tzalaj kyi'j qeju minti' kypaltil.

²¹Axix tok mlayx tzik'x ti'j tu'n mi'n tkub' tcastiw aju xjal b'inchal mya b'a'n, atzun qe xjal tz'aqlxix che kletel.

²²Aju xu'j mejor ke'yin ex minti' tnab'l, junx ta' ik tza'n jun xmulq'ab'aj q'an pwaq ttx'otx'il tkub' twi ttxa'n jun b'och.

²³Aju kyajb'il xjal tz'aqlxix, tkyaqil maj b'a'n nne'la; atzunju kychkinib'il qeju b'inchal mya b'a'n noq q'oj in tzaj tu'n.

²⁴At xjal b'a'n q'on oyaj ex in tk'mo'n mas twitzju in xi tq'o'n, ex aju xjal xk'a kukx ktel tuj meb'ayil.

²⁵Aju xjal b'a'n q'on oyaj, noq kyja' t-xi' jawni; ex aju in onin ti'j tuk'il, ikx te ok ktzajel onin.

²⁶Aju xjal in kub' t-xk'ayin triw, in tzaj kyqanin xjal mya b'a'n tib'aj; atzunte xjal in xi tk'ayin triw kye, in tzaj kyqanin xjal ky'iwb'il tib'aj.

²⁷Aju xjal nno'k tilil tu'n tu'n tb'inchante b'a'n, in knet xtalb'il tu'n; atzunte xjal in jyon ti'j mya b'a'n, ax mya b'a'n tzul tib'aj.

²⁸Aju xjal nno'k qe' tk'u'j ti'j tq'inumab'l, kb'el tz'aq ik tza'n t-xaq tze' tzqij, ex atzun qe xjal tz'aqlxix, che okel ik tza'n tq'ab' tze' cha'x.

²⁹Aju xjal minti' in che ok tkwentin qeju ate' tuj tja, minti' ch'intl kyjel ten te; aju xjal minti' tnab'l, kukx ktel te tmajen ju xjal at tnab'l.

³⁰Aju xjal tz'aqlxix ik tten ik tza'n jun tze' in tq'o'n chwinqlal, atzunte xjal at tnab'l, in kub' ti'j kynab'l xjal tu'n, tu'n kyb'et tuj b'e b'a'n.

³¹Qa ma kub' tcastiw ju xjal tz'aqlxix tzalu twitz tx'otx', pyortzunlo te xjal b'inchal mya b'a'n ex aj il, kb'el tcastiw tu'nju otoq tb'incha mya b'a'n.